Holîya Ap Husî

Holîya Ap Husî

Mêrdeyê waya Ap Hesê Keyê Hesan Xala Xece rewna merdibi. Xala Xece, çend sêwirî mil de, vîya mendibî. Bi zor, pê fitr û malê zekatî, pê sedeqe û xeyran îdareyê xo kerdêne.

Xala Xece aşma rojeyî de nêzdîyê roşanî pêhesîna ke do birayê aye Ap Hus şo Licê. Serê sibayî rew, a zî pey ra kewna Ap Husî dima, şina Licê.

Çarşîya Licê de Ap Hus dikan bi dikan gêreno, keyeyê xo rê çî-mî herîneno. Axir dikanê pirtî de Xala Xece Ap Husî qefelnena. Xala Xece xo rê seba pirênî çend metreyî qumaş bazar kena. Ap Hus mecbur maneno, heqê qumaşî dano.

Nêzdîyê êreyêk her di pîya Licê ra kewnê teber. Rayîr ra rastê çend cinîyan benê. Xala Xece û ê cinî biney pers-mersê yewbînan kenê. Her kes rayîrê xo ra şino. Badê ke cinî şinê, Ap Hus fetelêno Xala Xece ra vano:

- Herê Xecê, ti çend nankor a! Qey to o qumaş nîşanê ê cinîyan bidayne, to bivatêne birayê mi no pirên mi rê girewto, qîyamet weriştêne?