zazaki.net
19 Tebaxe 2017 Şeme
Girdîya Karakteran : 12 Punto 14 Punto 16 Punto 18 Punto
02 Nîsane 2010 Îne 08:57

Heyfgirewtişê Armenî

[Fiqra]
Nusret Aydin

Yew tirk, yew awusturyayic û yew zî armenî Erebîstan de pîya xebityenê. Yew roce enê  hîrê emeleyî wazenê bîra bişimê. Şansê cîn ra polîsê suûdî cîn veyneno. Ca de cîne tewqîf kenê. Mabên de rocî vîyarenê, feqet netîce de yew roce enê hîrê emelan vecenê mehkemada şerîetî. Hakim cîn rê 20 qamçuyî ceza deno. Lakîn a roje zî ameyîşê dinya yê cenîda qiraldê suûdîyan bîyo, ay ra cezaya emeleyan tikêna kêmî kenê. Hakim cîne ra wano:

- Ma yew waştişê şima anê ca.

Verê hemîne awusturyayicî ra perseno. Wano:

- Waştişê to çi yo?

Awusturyayic wano:

- Madem ki şima qamçuyan danê manedê (mîyaneyê) ma ro, waştişê mi o yo ki yew başna (balişna) manedê mi ro pêşê, balem (barî) maneyê mi tikêk muhafeze bibo.

Polis waştişê cey ano ca. Başna manedê cey ro pêşeno feqet panc qamçuyan ra pey başna parçe-parçe bena. Qamçuda desin de awusturyayic xereqyeno. 

Polis cey gêno fîneno yew kinar. Dore yena tirkî ser. O zî wano:

- Waştişê mi o yo ki di başnan manedê mi ro pêşê. 

Polis waştişê cey zî ano ca. Di başnan manedê cey ra pêşeno. Feqet qamçuyda pancêsini di o zi perîşan beno. Polîs tirkî zî fîneno yew kinar. 

Dore yena armenî ser. Hakim wano:

- Ti lacê yew miletê qedîmî yî. Miletê to senetkar o. Şima zaf cefa anta. Aye ra ma di hebî firsetan, yanî, ma heqê di hebî waştişan danê to. Wace, ma veynê, ti çi wazenî.

Armenî wano:

- Ez zaf sipas kena. Waştişê min o verin cezaya mi bike 100 qamçuyî. 

Polîs û hakim şaş manenê. Wanê, eno delu yo çi yo? Meraq kenê. Wanê:

- Êêê, temam. Waştişê to yê diyin çi yo?

Armenî wano:

- Labelê herinda başna de ez wazena şima nê tirkî biyarê manedê mi ro bipêşê û qamçu bikerî. (*)

__________

(*) Mi na fiqra embazê xo Richard Asergianî ra eşnawite û sey qalîkerdişê ey nuşte. (N A)

Na xebere 1785 rey wanîyaya
No nuşte hema şîrove nêbîyo.