zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
01 Gulane 2020 Îne 12:54

Heyatê Ma Telefon

Evdî Hesqera

-Aloo... Delalê mi, ez to rê zaf zaf zaf teşekur kena. Ti zaf centîlmen î, zaf kubar î. Gula ke to erşawita bol rindeke bî. Eyro pêro maliman rê gul û vilî ameyî la gula mi hedîyeya tewr rindeke bî. Heme mamosteyan dî, çend tenî zî hesed ra merdî… Ahaha! Wa geber bê… E, mi erebaya xwu tamîrxane ra arde… E wulay, tede benzîn nêmendbi, gama ke to telefon kerd ez newe kewtbiya benzînroş, o semed ra mi anêkerd… E, karê mi qediya. Nika ereba biya zey fuze!... Bol ferq keno, bol! Heqê tamîrî?... Pîyê mi da. Hesabê xwu ra westayî rê rişto. Mi va ez zî şêna bida la babîşê mi nêverda. Bipawe ez do dekewo asansor, beno ke telefon nêanco la fina zî megêre… Megêre megêre, ez wazena gama ke ez vecîya ti xetî ser o bî. (…) A ez vecîyaya. Asansor nîno, bela wo! Hela bipawe ez kêberî aka… Wulay canê mi, nika ez do qehweyek viraza û verê televîzyonî de ronişa, kêf bika. Inê di rocî yê ke otobusan emrê mi werd, mînîbusan pîzeyê mi kul kerd. Ca çin o merdim ronişo, şofêr nêvano zere de cînî estê, qicî estê, nengan çineno… Alla! Iiiiyyy! Ino çi yo! Pûje! A do se kera! Ay ay ay! Ez senî bika?! Nê, hêrîş nêkena. Şiyo perdeyî ser! He, ti camêrd î, to rê derd nîyo tabî! Leyîr-meyîr nîyo, gird o!.. To va ez şimik bidî ci ro? Ez nêşena! Keye de sprey zî çin o, ez parfum bierza ser?! Ayh! Ino çi bela yo, çend rocî yê ke mi rehet nêkerd! Ayy, parfum zî kîmyasal o, wulay ez do parfum bierza ser… Bigêre bigêre, ez parfum ana. (Des deqayî dima) Alooo... Ay delalê mi. Ez merda… E, mi parfum eşt ser, merd la ez zî merda. Pûje ver ma nêeşkayî qisey bikin. Gula to bol weşe bî, noto ke to nûştbi zî winî bi. Del-melê ke hesûdey kenê... E, qican? He, înan zî hedîye medîye ardî. Keynekan lacan ra bolêr ardî. Sinifê pancin ra yew keyneke tîşort ard. E wulay. Tîşort, gulî, kaxidê rengînî ke ser o "Ma şima re hes kenê" nuşte yo... Lacekêk zî resmê mi viraştbi la hende weş nêbi… E, yaw heme wendoxî, domananê Sûriyeyijan zî çiyê winî kerdbî. Mi zerrîya xwu de vat, lawo şima Sûriyeyîj ê, şima vêşaney ra mirenê, ma şima rê roca mamosteyan çi!.. E, Sûriyeyij Sûrîyeyij o! Texmîn bike, yew keynaya Sûriyeyije çi ardo? Yew bîskrem! E, tenya yew bîskrem. Puskewît esto, a o bîskrem ha… Çi? To qey vat of? Alooo. Alooo! Alla Alla, herhal şebeke şi!


Na xebere 2016 rey wanîyaya
No nuşte hema şîrove nêbîyo.