zazaki.net
24 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
23 Çele 2011 Yewşeme 17:56

Hewnan de zî ez o ziwanê xo vindî nêkerî

Séchu Sende

Ez hîna pancserrî ya û zana ke hîna zî zaf çîyan fehm nêkena. Mesela, [ez] nêzana ke çira lingê ma biengişt ê yan zî seba çî [ez] bi destê çepî nusena.

[Ez] tayê çîyan zana. [Ez] hes kena ke her çî bifikirî. Mesela, [ez] zana ke çekuyî fek de virazîyenê. Tayê înan zaf xorîn ra, tîya ra, qirike ra vejênê. Zafê înan zî ziwan ra. Gama ke ez çekuyêk fikirîna reyke de yena serê ziwanî, çîyo ke [ez] bikerî, ganî [ez] aye bilebitnî û çeku fir dana vejêna teber. Welew ke nêasena zî. Kam gama ke bêro nuştene o çax yena dîyene. Gama ke [ez] musayêne wendiş, rojêke fikirîyaya ke heme çekuyê dinya ha pîzeyê mi de. Dima mi fehm kerd ke wina nîyo, çekuyî zî sey fikran ê, tîya yê û ney, tîya nîyê. Gama ke [ti] vanî fikrêkê mi esto, seke çekuyî fikrî reyde yenê serê ziwanî, fikrî zî a game yenê sereyê [merdimî]. No wina yo.

[Ez] nêzana çira la ewro mi qet ewnîyayîşê ziwanê xo ra fek veranêda. Aaaaaaaaaaaaaaaaaaa. Seba ke ez tersena. Seba ke ding de cinîyêk a bîne ra vatêne problemo tewr pîl o yo ke tutî ziwanê xo vindî kenê. Wina vatêne: tutî ziwanê xo vindî kenê. Ez kaleka aye de roniştbîya û vengê aye baş ameyêne mi. Û cinîka bîne zî bi saw vatêne, belê belê…

Ganî ez dingê badê pey de biameyêne war. Seba ke dadîya mi bi destê mi girewtbi û gerek ma bişîyêne şarkuterî. Badê ke ma resay bi şarkuterî û mi makîne ra numreyêk girewt, mi dadîya xo ra persa: Dayê birra tutî ziwanê xo vindî kenê? Seke mi çîyêko xerîb persayo mi ra ewnîya, behsê numreyê newî kerd ke mi bi zehmetî fem kerdêne, reyke de cidî bîye û wina va: Belê, zaf kêna û lajekî ziwanê xo vindî kenê, xaseten bajaran de. Di sey giramî penîr keremê xo ra.

Tersêk ez girewta, seba ke ez bajarêk de ciwîyayêne û hîna zî [ez] kênekêk bîya. Û mi ziwanê xo vetêne, aaaaaaa, mi ewnîya[yêne] gelo hîna zî cayê xo de yo.

Agêrayîş de otobuse de mi hewna eynî çî eşnawit. Radyo ra. Badê deyîrêk ke [ez] nêzana yê kamî bî, camêrdêk qisey kerd û vat ke problemê vindîkerdişê ziwanî seraserê welatî ra vila beno. Çekuya “vilabîyayîş”[î] wina vatêne, seke behsê nêweşîyêk, mesela zekeme yan zî gama ke hamnanî adir bi daristanan keweno vila beno û nêkeweno binê kontrolî, kerdêne. Mi dadîya xo ra persa: Seba ke ziwan vindî nêbo merdim şêno se bikero? Va, qiseykerdişo zêde. Senî yanî merdim zêde qisey bikero? Belê, zêde. Bêvindertiş, va. Demeyêk ke dadîya mi ez nêdîyêne de mi va aaaaaaa û ziwanê xo vet teber ke ka uca yo yan ney. Ox!

Naye ra ewro-miro bêvindertiş ez qisey kena. [Ez] merheba, merheba, rojbaş, merheba, şewbaş vana û selam dana her kesê ke cade ra vîyareno. Asansor de mi cîrana ma ya ke qatê hîrine de manena ra va, dadîya mi bazar ra di sey giramî penîr, di sey giramî sucuq, hîrê sey giramî salam, hîrê bîftekî goşto sûr erînay û gama ke [ez] resaya bi keye zî mi dest bi deyîra karîdes, des, des kerd.

Mi deyîr û qiseykerdişê xo têreyde dewam kerdîy û hende qisey kerdbi ke dadîya mi serê şamî de va, merdim gama ke werd weno qisey nêkeno.

Rey-rey [ez] ziwanê xo vejena vana aaaaaaaaa û merheba, ti tîya yî? [Ez] persena. Merheba. Oxx.

Ez fehm nêkena, senî ziwanêk vindî beno. Bira zî fehm nêkena. Kesêk senî şêno ziwanê xo vindî bikero? Ecêb o. Labelê eke her kes wina vajo, a game rast o. Se beno se nêbeno hewnan de zî ez o fek qiseykerdişê bi ziwanê xo ra veranêdî. Wilay wina yo. Hewnan de zî ez o ziwanê xo vindî nêkerî. (*)

___________

(*) Îrfan Gulerî na hîkaye galîzkî ra çaranaya tirkî, Abdullah Keskinî zî tirkî ra çarnaya kurmanckî, Roşan Lezgînî zî kurmanckî ra çarnaya kirdkî.

Çime: Séchu Sende, Di xewnan de jî ez ê zimanê xwe winda nekim, Weşanên Avesta, Çapa 6., Stenbol, 2010, r. 57-58

                       

Na xebere 2836 rey wanîyaya
ŞÎROVEYÎ
awê awê awê goştî
ehmed
hîkaye zaf rindbi. ina bala mi ant badê hîre ziwanan ra pey resaya ziwanê ma feqet çîyêk zî xo ra vîndî nêkerda, herhalde hem zaf weş çarîyaya hem zî halê ma ra behs kerda aye sebeb ra ya.
23 Çele 2011 Yewşeme 23:58