zazaki.net
28 Adare 2024 Panşeme
Girdîya Karakteran : 12 Punto 14 Punto 16 Punto 18 Punto
01 Tebaxe 2011 Dişeme 10:30

Hewnê Şilîye

Bedrîye TOPAÇ

Seltenetê tîje qedîya û şilîya barîye bi ters hêdî-hêdî vara. Rîyê asmênî de bruşkî virsay. Mundîya Hezretî Fatma hewt rengê xo yê rindekî arê kerdîy. Kuçe de tena vengê çimanê yew cinîke û yew camêrdî ame hesnayene. Vengê bînan bi bêvengîye qayîte înan kerd.

Camêrd hendayê Dîcle xemgîn bî. Zerrîya ey de adirê dewanê dûrîyan veyşayêne. Ey huyayîşê xo şewe de caverdabî. Vengê ey pirr lej bî. Çimê ey sey geme bî. Tarî û xorîn… Vengê çimanê ey de teynayîye meyman bîye.

Cinîke hendayê Munzurî qefelîyayî bîye. Zerrîya aye de şilîya payîzî varayênê. Aye huyayîşê xo tarî de caverdabî. Vengê aye pirr heyf bî. Çimê aye sey koyan bî. Tirr û kemerin… Vengê çimanê aye de hewrê tarî meyman bî.

Her di kî bermayîşê ra ameybî na dinya û her dem jubîn gêraybî. Demê xeletî de, cayo xelet de ameybî têhet. Zaf erey mendbî. La reyna kî çimê înan peşmerîyayêne. Çunke ê leteyê jubînî bî û na dinya de rastameyîşêko erey înan rê bîbî dîyarî.

Cinîke bi çimanê xo vat:

- Cu bê to zaf giran bî, rayîrê to pirrê telî bî. Mi seba to her şewe ruhê xo rusna rîyê asmênî. No semed ra ez her şewdir bêruh rîyê hardî de geyraya. Mi seba to vengê xo vîndî kerd. La hewna zî to geyrayîş zaf weş bî.

Camêrdî zî bi çimanê xo vat:

- Cu bê to mi rê zî zaf giran bî, rayîrê to pirrê kardî bî. Mi seba to çimê dinya veşnayî. No semed ra ez bêçiman mendo. La hewna zî to geyrayîş zaf weş bî.

Cinîke ruhe xo rusna zerrîya Dîcle. Camêrdî zî çimê xo rusnayî zerrîya Munzurî. Şilîye xo peritna û berma. Camêrd û cinîke peyê xo çarna yewbînî, şîyî. Çunke ê yew parçe bî. Qet jubînî nêdejnayênê. Û badê ageyray reyna ewnîyayî pêra. Cinîke herre de şîye, vînî bîye. Camêrd awe de şî, vînî bî. Zaf erey bo zî wext wextê heskerdîşî bî. Seltenete şilîye de herre û awe bî yew leşe…

No yew hewn bî. Hewnê şilîye bî. Tena tayê merdiman û tayê estareyan no hewno niminite dîbî. Şilîye hîna ke tîje nêameya, hesrê çimanê xo girewtî û şîye bi hewnêkê neweyî…

Na xebere 3284 rey wanîyaya
No nuşte hema şîrove nêbîyo.