zazaki.net
24 Tebaxe 2017 Panşeme
Girdîya Karakteran : 12 Punto 14 Punto 16 Punto 18 Punto
23 Kanûne 2011 Îne 14:16

Hewnê Kirdkî

Emîne Guzel

Çî rê ziwanê mi qefilîyayo? Çî rê zerra mi di çîyê esto ki ez kena pê biteqa labelê ez lal bena, nêşta çîyekî vaja?

Rey-rey ez xeyal kena, çik çekuyê kirdkî estê dormarê mi di, wariştî mi ra hesab persenê. Mi ra vanê ti kam a? Ziwanê to çi yo? Aya çax ez ancîna lal bena. Ez fekê xu akena ki qalî bika, çekuyê tirkî mi fek ra vecîyenê û ez şermayena, ancîna huş bena.

Yew şero pîl mi zere di warişto. Ez waxto ki bi ziwanê xo fikirîyaya, mi dî ki ziwanê tirkî qîmê mi nêkeno. Mi aya çax fehm kerd ki ziwan yew çîyo ana muhîm o ki hîsî mi zerrî di hezeyê çirî herikîyenê û eno keyf yewna ziwanî di çinî yo. Ez bi yewna ziwan nêşta ana bi keyf bifikirîya. Ziwanê mi yew orîjînalîte dano mi. Sewbîna çîyêk yan ziwanêk enê hîsî nêdano mi. Ziwanê bînî di ez her kes a, ziwanê xu di ez ez a.

Eno şer, şerê min o. Belkî destpêkerdişê enê şerî, mi dest di nêbî. Mi nêwaşt ziwanê mi û yewna ziwan pêkewî. Eno tercîh mi ra nêpersîyabî. Labelê ez zana ki ez enka mudaxele nêka ko zaf çî mi dest ra şêro.

Enê roja mi yew çî ferq kerd. Ez hewnanê xu di tirkî qalî kena. Yanî ez tim hewnê tirkî veynena. Demek ez zaf tirkî fikirîyena coka hewnê mi bîle tirkî yê. Eno hal zaf çî vano. Ez û ciwanê ma yê ki sey min ê, ma yew halê senî hawayî di yî, eno hal eşkere keno.

Ez ziwanê tirkî di xurbete ancena. Hesreta ziwanê mi ko key biqedîyo? Demê hewnanê kirdkî ko key bêro?

Na xebere 1742 rey wanîyaya
No nuşte hema şîrove nêbîyo.