zazaki.net
02 Tebaxe 2021 Dişeme
Girdîya Karakteran : 12 Punto 14 Punto 16 Punto 18 Punto
11 Hezîrane 2021 Îne 08:42

Hesabo Raşt

Evdî Hesqera

Lacê kutikî! Kutik lacê kutikî him zî! Ameyo hêgaya ma ser, mi rê nengan çineno! Ez yena to!

Her di kalikê ci zî axa yê! Toximê heran! Şorişgêranê hewtay û heştî weş kerd! Ooxx! Ez zî maya to!...

Law pesê şima kewenê hêgaya ma, ma çiyêk nêvanê. Dewarê şima bostanê ma kerdo otoban, ma vengê xwu nêkenê. Nika zî ti yenê belayê xwu geyrenê, he?!

Di tenî dezayê ci zî yenê!

1+2 = 3

3 > 1

Keye de vîst tenê bînî estê…

3+20 = 23

23 > 1

Way çimanê mi ser! Şima xêr ameyî! Hehe! Ganî ma lec-mec nêkerê. Extîyaranê ma winî kerd la gerek ma gencî enê edetan bibedelnê. Hela ronişê ronişê. Kerem bike cixarayêk… Şima zî bigîrê… Hah, şerm mekerê… Ma unîversîte seba çiyê winasî qedêna, hehe!

Nika nîmeyê dewijanê ma bar kerd şi bajaranê dûran. Şî kewtî welatê şarî. Uca de se kenê? Înşeat, kanalîzasyon, kolonîzasyon, dekolonîzasyon… Xizmetkarîya miletanê bînan! Ma rê eyb o. Qey çî ma tiya de seba varekêk, seba golikêk yewbînî bikişê û bibê mihacir…

Nê wulay, heta şima beşilayêk êewerê ez şima veranêdana. Frantz Fanon, Edward Said. Hela biwere biwere… Ez do senî telafuz bikerî yaw… Ngugi wa Thiong’o… E, şima fam kenê, ne? Şorişgiranê hewtay û heştî zaf xeletî kerdî. Seba ci înan ra çiyêk nêvecîya… E wulay! Axa zî ma ra yo, feodal zî feodalê ma bi xwu yo. Eke ma miletê xwu bikişê ma do bi kamî şorîşê xwu temam bikerê!

Hela vinderê, bi Quran ez nêverdana! Xiyarê nazikî estê, ez bidî arê biyarî. Temam, şima nêwenê la qican rê biberê… Wa eno zebeş zî silamê mi bo, bibê xal Eşrefî re. Tomatêz! Tomatêzan zî biberê ema Xatûne re. Ez lew nana aye dest ra. Zey maya ma hemîn a. Ez hema yena, heta şima beşilaya xwu biwerê ez hema ageyrena…

Na xebere 193 rey wanîyaya
No nuşte hema şîrove nêbîyo.