zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
11 Adare 2010 Panşeme 07:58

Herê Kamî yo?

[Fiqra]
Alî Aydin Çîçek

Yew dewa Gimgimî de merdimode kokim bîyo. Nameyê merdimî Silêman bîyo. Dewijî pêro ey ra vanê Silo Qij.

Yew roje Silêman tûrîke xo cêno û şono çol de sungan dano arê. Hetanî şan sungan dano arê, tûrîke xo hetanî fek keno pir. Tûrîke xo ke keno pir îndî kuno rayê û ver bi dewe êno. Xeylê ke rayê cêno û êno nêzdîyê dewe kaşê corê ey ra heşode girs û sîya kuno ra dime. Senî ke heş kuno ra ey dime, Silêman hişyarê heşî beno û zor dano lingan. Silêman hewtayserre yo labelê tersanê heşî ra sey xortê vîstserreyî gaman erzeno.

Xeylê wext winî o û heş pîya rayîr cênê. Silêman ver de heş zî pey ra rayîr cênê û ênê nêzdîye dewe. Wexto ke ênê nêzdîye dewe embazê Silêmanî Qemer verçimikanê xo yê qalindan şaneno verê çimanê xo û qaytê Silêman û heşî keno. Silêmanî nas keno labelê o ke pey ra êno, ey ra çîyê fehm nêkeno. Cayê xo ra urzeno ra û Silêmanî ra vano:

- Ero Silo Qij! Ero o çi her o to dima êno!

Qoranê Silêmanî de qudum nêmendo. Silêman qehrîno û Qêmerî ra vano:

- Herê pîyê ti yo ero, herê pîyê to!

Na xebere 3046 rey wanîyaya
No nuşte hema şîrove nêbîyo.