zazaki.net
18 Teşrîne 2019 Dişeme
Girdîya Karakteran : 12 Punto 14 Punto 16 Punto 18 Punto
02 Êlule 2019 Dişeme 13:09

Gêl ra Deyîra Zirabê

Arêkerdox: Şahab Laçîn

Leyro lawo Zirabê

Dayê leyro Zirabê

 

Zirabi şiya qirşikî

Çerez kerdî dendikî

Sewlê Zirabi şinik î

Zirabi keyna kutikî

Ardî teştê cemikî

Zirabi pewcena lolikî

 

Leyro lawo Zirabê

Dayê leyro Zirabê

 

Zirabi şîya Qesarî

Dekewta bexçê şarî

Çînay elbê xîyarî

Xîyarî nîyê, hinarî

Hinarê serrda parî

 

Leyro lawo Zirabê

Dayê leyro Zirabê

 

Saya Palî dersaynî

Zirabi vecînaynî

Yew xwu mundî ver naynî

Kuçe bi kuçe geyraynî

Pey xortî xapênaynî

Zerra xortan helnaynî

 

Leyro lawo Zirabê

Dayê leyro Zirabê

 

Zirabi şona qirşikî

Ronena bendikî

Çipi-çipa şimikî

Arêkena dendikî

Virazena lepikî

 

Leyro lawo Zirabê

Dayê leyro Zirabê

 

Zirab lawo se kena

Peşmê mêşnan şiwena

Layîf û doşek dekena

Kê kekoyî di veng kena

 

Leyro lawo Zirabê

Dayê leyro Zirabê

 

Zirab, Zirab, Zirabê

Zirabi şona dîyarê koyî

Veng yeno vengê kekoyî

Zirabi bena çilka doyî

 

Leyro lawo Zirabê

Dayê leyro Zirabê*

___________

Zirabê: Ziravê. Fekê Gêlî de vengê v tadîyayo biyo b.

*Mi ena deyîre 12.07. 2019 de Gêl de Mehla Derî de, fekê Şukurya Can ra nuşte.

Tablo: Danuta Michalska

Na xebere 660 rey wanîyaya
No nuşte hema şîrove nêbîyo.