zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
30 Oktobre 2009 Îne 21:41

“Firçe eştene”

[Fiqra]
Roşan Lezgîn

Serra 1987 de mi sîteyê sinaî yê Dîyarbekirî de lokanta şuxulnayne. Mîyanê karkeranê mi de yew tuto duwês-hîrêsserre estibi. Nameyê ey Hus bi. Tutêko rindek û şîrin bi, zaf sempatîk bi. (Nika babîyê tutan o. Bîyo darqewanêko çorçore.) Ge-ge mi kebab yan tayê lehmecûnî pakêt kerdêne, Husî reyra şawitêne keye. Rey-rey şîyêne keye ra gomlek yan kincê utîkerdey ardêne. Axir çi lazimatîya ma bi keye bibîyêne, ma vatê Huso ha Huso, dê vazde. Tutanê keyeyê ma, dadîya mi, hemîne Husî ra hes kerdêne. Êdî bibi sey tutê keyeyê ma.  

Rojêk hewna mi tayê çî-mî pakêt kerdî, day Husî, berdî keye. La şan de ez ke ameya keye, mi ewnîya ke dadîya mi heredan a. Wina bêmade ewnêna mi ra. Çî yo, se bîyo? Ez nêzana. Nat ra wet ra, ez bineyke kewta dorê aye. Wilay nişkave ra teqa:

- To çira dayo Husî ro?

Emelê mi sîya yê! Ha to rê ez, ha to rê Hus. Dadîya mi kerd piro, nêvindena. Çimê aye sûr bîyê. Vana û vana:

- Ti camêrdo pîlo temam î. Ti wayîrê cinî yî. Ti qasê qantirî yî. Ti şinî xo kenê hevalê nê tutekê masumî, ti danê piro. Senî destê to ro ey berz bîy, hewwûû?! Keyveşaye…

Lahewle wela… Pirodayîş kotî ra vejya? Ez sond wanena, selewatan varnena. Eyb o eyb. La vana îlela nêvana. Mi ra bawer nêkena. Vana:

- Hem zî to bi firçe dayo piro. Tuteko masumo gunek. Êdî to ver remayo, se bîyo. Ti firçe erzenê tutekî…

Seke ez hewn ra aya bî, mi va:

- Heee? Ez firçe erzena?!

Va:

- Firçe û çimê to! Ez Husî ra persena, vana, keko to rê baş o yan ney? Eleqeyê to keno? Hus vano, wele ewro firçe eşto mi. Merdim bikuwo zî, bi firçe nêkuweno. Yew lemate dano piro, bes o. Ti fedî nêkenî, ti bi firçe nê tutekê masumî kuwenî?...

Hema newe hiş yeno sereyê mi. Bineyke bengzê mi abeno. Ez bi huyayîş vana:

- Wîîî! Da dayê, vato firçe erzeno mi, yanî vano ke…

Nêverdena ez qala xo temam bikerî. Yew rey hêrs bena:

- Yanî vano ke… çi yo? Elekîye meke! Nat û wet fetl û fatulan mede piro. Ti reyna-reyna gîyêko winayin biwerî, ez nêverdena linga to biyero keye.

Mi ewnîya ke çare çin o. Nêverdena ez mesela aye rê îzeh bikerî. Xora ez vajî-nêvajî, kertê xo ra nêna war. Reyêke dekewto bi sere ke mi bi firçe Hus kuwayo. Hus mi ver remayo, mi firçe vir kerdo eşto Husî.

Kewt roja bîne, mi îfadeyê Husî girewtî. Hus vano:

- Keko wilay mi nêvato dayo mi ro. Dada va, keko to rê baş o yan ney? Mi zî va, mi rê baş o la rey-rey firçe erzeno mi. Aye zî va, de ti mi rê vindere, wa şan de bîyero keye, ez çi ana ey sere de…

Ez werişta mi Hus şawit keye. Mi va, şo manaya “firçe eştene” dada rê îzeh bike. Hus şino îzeh keno, la dada tirkî nêzana ke manaya “firçe eştene”yî çî yo ke fehm bikero. Husî ra vana, ey ti musnayî, ne?!

A bi no qayde kuwayîşê Husî bi suc û kewt vileyê mi. Ez senî zî bikerî, ti ewnênî vana, eyla ti musaye yî…
Na xebere 3115 rey wanîyaya
No nuşte hema şîrove nêbîyo.