Ez Yoxtir Zî Wena

Dat Bayram û Emika Şengule pîya zewijyenê. Datê ma qet bi tirkî nêzano. Emika Şengule zî tirk a la qandê ke dorûverê dewa înan de kurdkî qisey beno kurdkî fam kena. La nêşkena bi kurdkî qisey bikero. Zewijyayîşê Dat Bayram û Emika Şengule ra pey Dat Bayram rojêk şono pesî (malî) ver û qandê werdê mîyanrocî agêreno keye. Datê ma veyşanîye ra keno ke bimro. Dat Bayram bi lez vano:

- Hela mi rê nan bîyare.

Emika Şengule fam kena ke Dat Bayram se vano. La nêşkena bi kurdkî cewab bido. Vana:

- Yoxtir!

La datê ma kotî ra bizano ke “yoxtir” çi çî yo. Qalê Emika Şengule ra çîyêk fam nêkeno. Dat Bayram ewnêno ke çîyêk nêame fina bi vengêko berz vano:

- Hela nan biyare, ez nan biwerî!

Emika Şengule fina vana:

- Yoxtir.

Dat Bayram zî vano qey no “yoxtir” nameyê yew werdî yo. Vano:

- Ti biyarî ez do yoxtirî zî biwerî!

Dat Bayram û Emika Şengule hîna zi ciwîyenê û dewa ma de yê. Ez par şîyo dewa ma, mi Dat Bayram dî, mi ra bi tirkî va:

- Yegen nasılsın?

Mi ewnîya ke Dat Bayram tirkî hol musayo. Gama ke ez şîyo keyeyê înan çimê Emika Şengule mi kewt, hema mi reyde bi kurdkî qisey kerd. Ma pîya kurdkî reyde hal û rewşa yewbînî pers kerd. Heta mi dî ke Emika Şengule endî qet tirkî nêzana, ziwanê xo xo vîrî ra kerdo la herinda aye de Dat Bayram tirkî musayo.