Estareya Duwêsserrîye

Rojan ra yew roje, yew dewa şên û şênayîye bena, virara yew koyê berzî de. Mîyanê dewe de banêk beno. Banêko rind û şîrin, sey qutîye. Zereyê ê banî de kênaya porsîyaye û çimgilore bena. Nameyê a kêna Ceylane bena.

Ceylane hinde rind û nazenîne bî, şewe aşme, roje zî tîje Ceylane qayît kerdêne. Rojan ra yew roje, tîje bi zor aşme ra nobedarîye gêna û peyê koyan ra pêl bi pêl roşn dana. Roşnîya tîje mîyanê daristan, koy û newalan ra vîyarte, bêsebir xo resna penceraya rengîne. Bendê peyênî ra xo xelisna û bi fesal porê kênaya sanikan têro kerd, bi şîrgermî lew na çimanê aye ra.

Kênaya sanikan roşnîya tîje ver bi keyfweşî û aramî hêşyar bena. Kincê aye kî pelê gulan ra yê. Ê kincî yew bilbilî aye rê viraştibîy. Seba porê aye pelpelikan vilikan ra tacêk viraştibî û solê aye pelê daran ra virazîyabîy.

Ceylane kincanê xo, xo ra dana, solanê xo kena linganê xo, taca xo nana sereyê xo ser de. Dadîya xo ra xatir wazena. Kaviran û bizêkanê xo, fînena xo dima, kewna rayîrê daristanî. Bi deyîran, huyayîş û çitmekî, şênayî rayîr gêna. Sereyê aye ser o heme rengan ra pelpelikî û mîlçikî geyrenê.

Zaf şona tay şona, resena daristanê sêhrinî. Nê daristanî de heme tewir ra heywanê kovîyî estê. Xezalan ra bigêre heta şêran, pêro embazê Ceylane yê. Nê daristanî de zerrîweşî û birayîye estbî.

Labelê zerrîweşî û birayîye ver de xirabîye Hûtê bî. Nê Hûtî çimeyê xirabîye ra şimitêne. Bi nebaşî cîf girewtêne û dayne. No semed ra kî timûtim hemberê holîye û rindîye bi.

Rindî, holî û safîya Ceylane roşn daynê daristanî. Hût yew koyê berzî ra ewnîyayne daristanî ra. Daristan bi safîya Ceylane ra pak û zelal ameyê dîyene. Na zelalî û roşnî Hûtî rê baş nêbî.

Na xezala duwêsserra bê suc û bê gune verê çimanê Hûtî de bîye seyde. Hûtî ra vengo bê tarîf vejîya. No veng fekê Hûtî ra teber erzîya, vila bi, lewê koyan lişt, yew guleyê hawanî, raşteraşt ver bi Ceylane ame. Tîje nêeşkayne Ceylane star bikero. Çunke yew çimê Hûtî bi. Ceylane sey krîstalêk şikîyabî. Heme krîstalî kewtî hewa, asmên ra vila bîy û sêhrê daristanî şikîya.

Ceylane nika asmên ra yew estareya duwêsserra ya, her wext duwêsserrîye manena.