zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
16 Temmuze 2019 Sêşeme 15:16

Estanika Citêrî û Luye

Arêkerdox: M. Selîm dêreyij

Cayêk bi, cayêk çinê bi. Merdimêko citêr estbi. Wexto ke şan de ageyraynî keye aleto ke pê cite keno, hîga di caverdaynî. 

Yew luye ey aqilîna û wexto ke o ageyreno keye şina rişta nîreyî alet ra akena bena. Rişte alete çermê heywanan ra virazîyaynî coka luye ina rişte werdinî.

Ino mêrik çand rocî pêsero şino ke rişta nîreyî alet a nîya. La çiyêk  dest ey ra nîno. Qehrîyeno, behcîyeno. Yew çare nêveyneno. Herê ey ino halê ey veyneno û ageyreno ey ra vano "Ti yew welçeka cewî bidê mi, ez rişta to veynena."

Mêrik, bêçare welçeka cewî dano herî. Her welçeka cewî weno, qedineno. Meşka ey bena sey dawili, şino berê qula luye ver qelibîyeno. Heme çar linganê xwu derg keno û çimanê xwu pêt digirîneno. Tarîyî nimacê di luye şina ewnîyena ke leşa herî ha ver berî qula ya di ya.

Ageyrena embaza xwu ra vana "Wayê yew leşa goşt ha fekê berî mi di ya, ma se kî, ma ina leşe senî berî zereyî qula xwu bîwerî?"

Embaza ya ageyrena ti ra vana "Ma rişta ay mêrikî gênî dekenî milê to û milê herî, ez zî boça herî tepişena, ma gênî benî zereyî qule, wenî."

Rişte gêna dekena milê embaza xwu û milê herî. Wexto ke wina kenî hema her hîz dano xwu, “tiz tiz tiz” keno û çarpay vazdeno.

Luye zî xwu reydi gêno vazdeno. Wexto ki her wina vazdeno, luya ke ha milê ey ra pê rişte besta ya, qijjena, bermena. Luya binê boça herî veradana û ard de manena. Luya ke ard de menda, ageyrena embaza xwu ra vana, "Xwuha mi xwuha mi, pepikê bidê erd,  pepikê bidê ard!"

Luya ke milê herî ra besta ya, qirrena vana "Xwuham pepik kurê nayê ard, pepik kurê nayê ard!"

Her wina vazdeno, luye beno hewşê wayirî xwu. Wayirî ra vano "Mi to rî rişte zî ardi, luye zî ardi."

Mêrik luye tewşeno bi ganîtî poste keno, solaw keno. Luye zereyî hewşî di vazdena, vazdena û weqena, qirrena.

Mêrik vano "Herey to ez qehrnaya, mi zî ina ceza daya to. Karê to çin yo biqîrri."

Mi yew elbe esirî viraşti û dormareyî dewa Dêreyi de çarnayi, yew gişta xwu nêardi bere. (Yanî yew nefssisteyî nêkerdi.) Lacê mi Mehmed Selîm gişta xwu ardi elbe esîrî. Mi zî darey girewti û da piro gişta ey dere kerdi.*

___________

*Mi ina estaniki maya mi Gewriki vat û mi zî nuşti.

Na xebere 3562 rey wanîyaya
No nuşte hema şîrove nêbîyo.