zazaki.net
19 Oktobre 2017 Panşeme
Girdîya Karakteran : 12 Punto 14 Punto 16 Punto 18 Punto
26 Temmuze 2014 Şeme 18:16

DÎYARBEKIR DE EŞQ

Roşan Lezgîn

 Berê Koyî ra hetanî Berê Ruha

             Gaman peymawena ez

                Ver û verê bedenî de...

 

Vayêko honik yeno, vayê koyan

                         boya rîhanî tede

Vakur ra yeno, nermek...

Xuşşînî kewta pelanê çinêyeran ser

Valêrî porê xo şane kenê vayî ver de

Xubêrî boyêka xumrî resnenê heme ca

Çîveçîvê meqesokan a, mîlçikî bi wîlewîl

Porê bedenî; çokêk vaş 

 

Sereyê mi xoş

Canê mi mest...

Xîyalê mi de abîyayîşê vilêka sûre

Û serê engiştanê rojî ra ez

Sosinan çînena qevd bi qevd... 

 

Tîya şerq o; Dîyarbekir yanî

Şingeşingê tasanê sifrênan a

Awa sûsî roşeno Bavê Elo û keynekî tuyan

Lewê înan “qere hubur”  

 

Duyê kebabê cîgere vila beno

Binê ziwanê mi de tehmê çayêka qaçaxe

Û zincîya mi boya titûnê Helhelî ra pirr

Ez tewirêna ya ewro; sermest

Zerrîya mi yew pirpirok a ewro 

 

Rîyê asmênê nîlgunî de hewrê gulanî

Va dest dano hewran û yena war:

Reşêşêka hurdî...

Dima ra, asmênê Dîyarbekirî de

Keskesûre bena keman

Kerrayê dêsê bedenî sereşute 

Awin-awin huyenê

Û kewe-kewe bereqîyenê pelê daran

Dîyarbekir o tîya; heme ca rengîn… 

 

Keynekêk wet ra yena; esmer-esmer

Çimê aye; mîyanê zeytî de çutêk zeytûnî

Û lewanê aye ser o çilkê varitî

Poro sîya vayî ver de rewan... 

 

Mîlçikî wanenê

Û ma, çimanê yewbînan ra awiran remnenê

Alişkanê ma de vilî abenê

Di zerrî: di pencerayê akerdeyî;

Di boranî sipî-sipî perrenê qefesan ra

Û ma çimanê yewbînan ra şerab şimenê:

-Noş!

-Noş!...

___________

Çime: Roşan Lezgîn, Dêsan de Sûretê Ma Nimite, Çapa diyine, Weşanxaneyê Roşna, Dîyarbekir 2013, r. 43-46

Na xebere 4884 rey wanîyaya
ŞÎROVEYÎ
varto
zaza
Helbestaki zaf weş bi seāt xweş
16 Adare 2015 Dişeme 12:48
ŞIBAK
Malmîsanij
Çekuya \"şibak\"e ziwananê samî ra ya. (Suryankî de \"şebbak\", erebkî de \"şubbak\".)
\"Pencera\" ziwananê îranîyan de esta.
Selamî.
12 Tebaxe 2014 Sêşeme 06:23
jir
baz estar
Kek roşan, helbestê to zaf weş bî. Labelê eke ti pencere ra şibak bivajî, weştir beno,kirdkî zêdetir beno. Ez tiya ra torî zaf sipas kena semede ke ti mûcadeleya kirmanckî danî. Homa rayê to û Gruba Xebate ya Vateyî akerde bikî.
28 Temmuze 2014 Dişeme 02:13