zazaki.net
30 Oktobre 2020 Îne
Girdîya Karakteran : 12 Punto 14 Punto 16 Punto 18 Punto
11 Oktobre 2020 Yewşeme 10:21

Dostê Kosmosî

Evdî Hesqera

Mixtar verê buroyê xwu de roniştbi, paştîya xwu dabî tîjî, xwu rê keyf kerdêne. Şi selam da:

-Way çimanê mi ser, bê ronişe.

-Nê mixtar. Ez qey ricayêk ameya. Vizêrî... To vat 'Eke çiyêk lazim bo, bê'. Iiii... Emin... Ez to ra çend milyarî deyn rica...

-Nê bira!

-Ê to vatbi ke kîmlîgê xwu bide mi, ez do nameyê to ser o tîcaret bikerî, faturayan, senedan virazî... Ez do komîsyonêk zî bidî to...

-Yaw mi vat la mi xwu rê winî vat... Zaten mi erebaya xwu rote, nika mi dir pere çin o...

-Ti vanê "Mi ereba rote, semedê ci mi dir pere çin o"?

Mixtar hêrsan ver bibî sûr:

-E, eynî winî...

Mixtarî ey zaf dejnabi. Xatir zî nêwaşt, zerrîya xwu de vat "Kosmos belaya to bido" û şi.

Des deqayî dima mixtarî rê mesajêk ame. Cînîya ci erşawitbi. Vatêne "Des serrî yê ke ez to dir zewicîyaye ya. Qicê ma nêbî. To qebûl nêkerd ke ma tup bebek zî virazê. Xwura ti kewtê mal û milkî dima, çimê to mird nêbeno. Ez yewî ra hes kena, nika ey dir remnena. Pereyê to sereyê to biwero!"

Mixtarî mesaj çend rey wend. Dima şi kewt buro, temançeyê xwu vet û reyêk şixulna.

* * *

Muemeleyê mixtarî moralê ci xeripnabi. Xwu rê vat "Ez qewirnaya, teber kerda…" Şi verê tuwaletê umûmî. Pere da, kewt zere. Gama ke vecîya, nata weta ewnîya ke sabûn çin o. Bekçî klûbeya xwu de roniştbî:

-Keko herhal to xwu vîr ra kerd, nê qutîyan de sabûn-mabûn nêmendo...

-Nê, mi xwu vîr ra nêkerdo. Qey sabûnê...

-Ê mi heqê to da...

-Lazim o ti pancas qirûşî zêde bidê...

-Ê...

-Ti goş nêdanê mi, heqê tuwaletî ciya, heqêê sabûnî ciya yo...

Zaf hêrs bibi la lazim bi destanê xwu bişuwo. Hema bi di engiştanê nîm temîzan pere vet, eşt ey ser. Sabûn ard, destê xwu şûtî. Gama ke vecîya, verê keyberî de vat "Kosmos belayê to bido" û şi.

Des deqayî dima bekçîyê tuwaletî prîzê linganê xwu ver de telefon kerd şarje. Qabloyê sobaya ceryanî, fîşê semawere û qabloyê bînî pêrû kewtbi pêmîyan. Gama ke sereyê xwu berz kerd, bi destê xwu da semawere ro. Çay rişîya, resa çimanê prîzan, uca elektrîkî mêrik girewt û merd.

* * *

Dostê Kosmosî ewnîya ke rocêk de di merdimî zewtanê ci ver merdî, poşman bi. Înan zerrîya ci şikitbî la meseleyanê hende girdan ver nêbi. Xwu rê vat "Dinya de meseleyê girdêr estê. Milet û hukmatê bînî ma kenê bindest, nêverdanê ma bi ziwanê xwu qisey bikerê... Ez nêşena şarî rê çiyêk bikerî, ez yena meseleyanê werdîyan de însananê xwu rê zewtan dana. Çiyêko bîn lazim o."

Wurişt, bi ecele şi otogar. Bîlête girote, nişt otobusa şanî, hewt saetî de şi paytextê serdestan. Gama resa uca serê sibayî bi. Şi verê meclisî. Qeydê xwu viraşt, kewt zere. Şi meqamê sereyê hukmatî het. Sekretere nameyê ci nûşt, vat "Salona bîne de bipawe, gama ke misaîd bi, ma veng danê to."

Çend saetî dima kewt meqamê sereyê hukmatê serdestan:

-Ti xêr ameyê. Kerem bike, ti çi wazenê?

-Ziwanê ma...

-Yaw ziwan caverde, xwura ti ziwanê ma weş qisey kenê, bêre ma to bikerê memûr. Meaşa xwu bigîre, biewnî keyfê xwu ra...

-Nê!...

-To vat "nê"! Şo, şo wehşîyê Homayî! Şima çi zanê ziwan çi yo, medenîbiyayiş çi yo! Wurze!...

Sereyê hukmatê serdestan zaf hêrs bibi. Peyayanê ci di deqayî de Dostê Kosmosî eşt teber. La ey zî zerrîya xwu de vat "Kosmos belayê to bido!" Des deqayî dima serek, bi jehro ke hetkarê ci areyî de dabi ver krîz kerd. Saetêk dima doktorê ci vecîya televîzyonan, vat "Serekê ma krîz kerd, merd!"

Hetkarê serekî sûc eşt Dostê Kosmosî ser. Emnîyetî o tepişt, kamerayan o ant, televîzyonan de vecîya. Îfadeyê xwu de vatbi "Mi tenya zewtî dayî piro, çiyêko bîn nêkerdo." Şewêk nezaret de mend, dima vecîya.

Serek merdbî la problem fina zî nêqediyabi. Televîzyonan vatêne "Meşte cinaza ra dima hetkar do bibo serek." Dostê Kosmosî ewnîya ke lazim o şewêk paytextê serdestan de bimano, şi keyeyê eqrebayêkê xwu. Şamî ra dima waşt ke xeberan temaşe bikero la qicanê wayirê keyeyî nêvarda, vat "Ma do dîzîya xwu temaşe bikerê." Dostê Kosmosî peşmirîya, çiyêk nêvat, çay ra dima şi rakewt.

* * *

Roja bîne cenazaya serekî ra dima hetkarê ci bi merasîm bi serek. Gama vecîya kursî ser, vat "Ez do polîtîkayanê ma yê hezar serran canêverda..."

Dostê Kosmosî fam kerd ke tenya nameyê serekî bedilîyayo, fikir eynî yo. Vat "Lazim o ez welatê xwu, însananê xwu miyan de çiyêk bikerî ke wazîyetê ma bibedeliyo." Şi otogar, nişt otobuse ke ageyro welat. La hende zaf bibi meşhûr, rayîr de raywanan rehetî nêda ci. Her kesî derdê xwu vat, çare waşt:

-Lacê mi çar serrî yê keweno îmtihan la qezenc nêkeno. Serra verîne puanê ci doktorîya dindanan rê bes bi la ey vat "Wa îlla tib bo". Serra diyine puanê ci zaf kemî bî, nêeşka doktorîya dindanan zî qezenc bikero. Her serre puanê ci kemêr biyêne. Ci rê duayek bike...

-Duakerdiş... Ti zanê ez tenya zewtan dana...

-Ez çend serrî verê nikayî bi zorê pîyê xwu zewicîyaya, bê zerrîyê xwu... Dima zî mi cînîyêka bîne arde, nika di cînîyê mi estê la hizûrê mi çin o. Eke ti xeyrê xwu înan zî hewaleyê Kosmosî bikerê...

-De şo!

-Wurze, mi rê zî enê heban û derzînan bide nuştiş...

-Ax extîyar, bê reçete heban mewer,e ti do xwu bikişê haa!...

Heta serê sibayî ewnîya ke her kes çiyanê şexsîyan wazeno, meseleyanê miletbiyayişî, xelisiyayiş xemê kesî nîyo. Cam ra ewnîya teber, bi nimitkî vat "Oofff!"

Na xebere 191 rey wanîyaya
No nuşte hema şîrove nêbîyo.