Domanê Şima û Domanê Ma

Dêrsîm de serranê hawtayan (hotayan) ra hetanî roja ewroyêne koyan ra şoreşgerî estê. Nê termînolojîyê xo de xo ra vanê “kewra”, “heval”, “xoca”, “xalo”. Labelê şarê Dêrsîmî hetanî serranê heştayan nînan ra vatêne “televeyî (talebeyî)”. Nê serran ra dima kî vanê “domonî”.

Serranê heştayan de gerîlayî erjene ra qereqolê dewa Xêçe ser. Qereqol kewno ra dest. Kuwnê zere. Çek, muhîmat, kincî, betanîye û matareyî çike kewtîy ra dest gêne (cêne) şonê.

Roja bîne dewijode kokim şono malî ver. Tene dewe ra ke beno dûrî, yew (ju) betanîye vîneno. Gêno erjeno ra hermeyê xo ser û xo rê malê xo ver ro vindeno.

O sire de kî zereyê Dêrsîmî ra esker ameyo, operasyon der o. Esker kokimî vîneno, hetê ey ser şono. Kokim tenekî terseno tabî. Betanîye keno ra derg, misneno ro qumandarî ke ci ra vajo ke birr de dîya. Kokimo fiqare tirkî kî nêzoneno. Vano belkîya tirkî kî eskerê xo rê vane “domonî”. Êdî (endî) vano:

- Qomutan beg bu sîzîn çoçuxlarindir yoxsa bîzîm çoçuxlarindir?