Dewaroyûs 2.0

Diiirrrttttt! DiiiiiiiirrrROROROEeeyyyytttttt!

- Wey mi may û cinîya to! De şo qewad! Hiiinnnnnkkkk! Hoooppp! Lacê qehpikan!

Biyî çewres deqayî ke ino trafîko berbat de, ino mehşerê erebeyan de, fekê pirdî de bi neng û heqaretan şofêranê bînan dir micadele keno. Xêrê Allahî hamnan o, seba ke klîma akerde ya, pêro camî girote yê. Ray seba heme wesaîtan girote ya, la o nêvindereno, ge keweno verê yewî, ge selektor keno ke yew cayê xwu bido ci. Eke şofêrî nenganê ci bişinawê do bêrê ey bikişê!

-Way way way, mi waya to!...

Diiirrrttttt! DiiiiiiiirrRERERERURURURURUREREeetttttt!

- Hela biewnî kincanê turîstan ra! Ti do nînan bigêrê, aaaxxx! Dima zî, vanê tecawuz kerd, filan û bêvan…

- Heqê însanan esto ke keyfê xwu gore kincan bidê xwu ra. La heqê “ma” çinê yo ke “ma” çiyanê winî vacê…

- Yaw ez nêşena bi atlet bivecî balkone, halê înan zî ti vînenê… De bêre û tecawuz meke!…

- Eke ti nêwazenê bivînê, mewnî înan ra…

- A ez biewnî ino het ra…

Mi dî gergedanêk bi tena şortê xwu serê pirdî de maseyan tepişeno.

- Biewnî, o zî rût o!

- O normal o…

Ez aciz biya, ageyraya embazê xwu ser, mi ey dir bi Kurdî qisey kerd la ey tehemul nekerd ke ma bi ziwanê xwu qisey bikerê. Labelê cesaret nêkerd ke dişmentîya xwu aşkera zî bikero.

- Bi ziwanê ma vacê ke ez zî fam bikerî…

Hella Hellaaaaa!

Des deqayî dima yew otobusa beledîya da eynaya ci ro. Erebe vindert, vecîya la gama lingê ci resa erd, vengê xwu kêmî kerd. Mi verê verkan vatbi herhal do mêrdekî bikişo la dî ke xemê şofêrê otobuse nîyo, ey xwu adapteyê teberî kerd. Şofêrê otoubuse bi verçimikê xwu Matrixî bî, vilînceyê xwu cawit û tenya camê xwu rona, la o zî tay.

- Çiyêk biyo?

Dewarîusî dî ke mêrdek ci ra nêterseno, teslim bi.

- Nê keko.

Ageyra cayê xwu, reyna erebe şixulna la ino fin zey derwêşo ke şiro bigeyro, halê dinya bivîno, sirranê kaînatî fam bikero kamil û sakîn bi.

- Ina eyna zî... Zey goşê arwêşî... Winî nêbeno!

(Badê Mîladî Serra 2181, Daîreyê Arşîvî)

- Nêbeno! Ina hîkaye de mêrdekî heywanan rê heqaret kerdo, ganî ma inê fikranê kalikanê xwu berteref bikerê…

- Ma se bikerê?

- Wa arşîv de cayo nimite de bo. Tenya wa akademîsyenî û cîgêrayoxî bivînê… Mesela, deyîrêk de vano “Yare ewro ma rê nano rûnin poto”. Rûnê çi yo? Rûnê heywanan. Şima qey çî heywananê bêguneyan rê hende zilim kerd? Seba rûnê ci! Ma inê zilmî qebûl nêkenê! Belgeyê tehdaya ke verînanê ma cînîyan rê kerdbî ma arşîvê xwu ra vetî. Nika zî ma do eynî çî qey zilmo ke heywanan ser o biyo bikerê.