zazaki.net
29 Oktobre 2020 Panşeme
Girdîya Karakteran : 12 Punto 14 Punto 16 Punto 18 Punto
19 Nîsane 2020 Yewşeme 15:11

DEJÊ SEREYÎ

Evdî Hesqera

Ez mirena, a nika mirena!...

Hende sereyê mi teweno, sereyê mi hende teweno ke îş nîyo! Tewayiş tesîrê xwu dano çimanê mi, ez hem mirena hem bena kor. Homa zano ke eno zî ekstrayê mîratê sînuzîtî yo, dejê bonusî!

Mi yew tîşort ard, zey korsananê gemîyan pişt sereyê xwu ro. Eke germ bibo, do tayê rehet bo. Verê nikayî zî mi dejê winasî dîyê.

Mesele vizêrî dest pê kerd. Edetê min o, her serê sibayî saete des de ez pîyê xwu rê telefon kena. Her qisaeykerdişê ma zî çewres-çewres û panc sanîya yê:

-Sibayê to bi xêr bo (Şodirî to weş bo zî nêbeno? Çi ra? Qey? Temam, ez lacekêko efendî ya, ez do nêherimîya û ziwanê pîyê xwu modernîze nekera.) Ti senîn î? Ez lew nana to dest a. Ti hêga der ê, hee. Emrê to essss... (Erê. Emrê ci estbi. Vat qasê şiyês milyarî lazim ê. Şima; to û birayê to her yew des milyarî bidê...) Ti do se bikerî hende milyarî? He, dedê mi hardê xwu roşeno? E, ti zî vanî ma bigêrê, wa yewo xerîb nêkewo miyanê ma. Ha, ti do wisarî her di hêgayan zeytûnêran bikarê. La ne ez yena dewe, ne zî birayê mi. Ti do kamî rê daran bikarê? Hende pere zî mi dir çin o, fek ci ra ver...

Pîyê mino ke çimê ci nêzdî ra weş nêvînenê û tim vano "ti telefon bigîre, ez nêşena bigîra" senî bişkoce dî û telefon mi ser o girot, mi fam nêkerd, ez vana alimê Swîsreyijî zî do fam nêkerê...

Hahooo! Verî çiyêko winî nêkerdbî. Ino mi rê bî derd! Derdê ci ra mi heme dosyayê ke kompîtur de akerdeyî bî girotî, zerrîya mi nêgêna ez bişixulîya.

Hela Hela! Ez do se kera? Meaşo ke ez gêna çar qurişî la mesref çewres û çar qurişî! Qandê ke miletê xwu rê medenîyetêk viraza ez ameya metropolê şarî de girweyena, goreyê standardan cuyena (yanî zey werdê dewe ez nêşena her roce bulxur biwera) ke ez jî miletê xwu rê, ziwanê xwu de medenîyetêko zey medenîyetê Ewropa viraza! Eke her hewte ez nêşina tiyatro, ez yew-di kitaban nêgêna, çend fîlman temaşe nêkena, ez do senî medenîyet viraza bawo?! Şarê mi do medenîyeto ke ez şertanê emeleyan de viraza ra çi xêr bivîno?! Temam, tiyatroyê dewlete esto. Ez eşkena şêra; bîletê tiyatroyanê xisûsî ra ercanêr, çepikê ci bolêr û belaş...  Kitabî zî ez do kitabxane ra bigêra: hîrê kitabî heqê min ê, pancês rocî wextê mi esto. Fîlman zî, ez do înternet ra temaşe bikera. Dublajê fîlmanê kalîteyinan kêmî yo. Ez do binnûşte biwana, wa çimê minê nêweşî yew rey kor bê, ma se ez kera? (Ez kor nêba, ti kor nêbî, kam do şarê ma rê medenîyet virazo?) La fina zî ez nêşena hende pereyî bida arê.

Derdê babayî ra dej kewt pizeyê mi. Ya Rebî! Ez vana “Ya Rebî” ez sebir wazena, la her ke şino mi de moral nêmaneno.

Ez masaya xwu ser o biya, mi dî patron ame vat "Emşo mesaî esto, meşo keye, bigurweye."

Haheeeeyyy!

Ella belayê şima nêdo! Heme personelî merdim û eqrebayê şima yê, heme ronişenê la ez gurweyena. Ewraqan ez ana, îmzayan ez gêna, taqîbatan ez kena, mişterîyan ez vînena…

Ino xînto ke nêşeno şîrketêko bîn de di milyarî bigêro, di qatê mi pere gêno. Ina dela ke zinca xwu de qisey kena û badê mi ameya biya amîra mi gîyek zî nêzana!...

Qaso ke yeno mi vîr, tenya çaycî xezebê mi ra xelisîya. Mi heme nengê ke hafizaya mi de bî lîsteyê personelê şîrketî de qedênayî.

O xînto ke di qatê mi pere gêno, a dela ke zinca xwu de qisey kena, pa heme xiyaranê bînan pêro biyî şahid, hemîne îmza eşte, patronî zî ez sey merdimo bêdîsîplîn û bêexlaq bê tezmînat kar ra veta eşta.

Ez çileyê zimistanî de heta keyeyê xwu yê mehlaya feqîran, heta banlîyoyê ke maneno dewan bêvindertiş meşîyaya...

Çi zewtê ke mi maya xwu ra şinawitbî heme xerc kerdî qedênayî. Nika sereyê mi teweno...

Na xebere 710 rey wanîyaya
ŞÎROVEYÎ
celik
dilan
'zey werde dewe ez nêşena her roc bulxur burî'
19 Nîsane 2020 Yewşeme 16:50