zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
27 Temmuze 2020 Dişeme 16:39

Berber

Evdî Hesqera

Seba ke nêzdîyê ma bi, ez reyêk-di rey şiya ey het, tiraş biya. Muhabetê ci hende weş nêbi la meqesê ci bêqisûr şixulîyayên...

Ez çend finî şiya dikanê ci, dima biya mişterîyo daîmî. Ê, gama o mertebe beno nesîb, merdim miemeleyêko weşêr vîneno. Çay yena, qehwe şino. Nînan ra wet, merdim eşkeno zere de cixara zî bişimo ke o zî şerefêko gird o.

Reyêk ez verê dihîre şiya, saete des û nîme yan yewendes bî. Mi dî televîzyon de programê cînîyan temaşe keno. Ez qoltix de ronişta, ey dest pê kerd, herdîşa mi taşte. Televîzyon de zî yew keynaya vîstserrî ke vindî biya, dima may û pîyê xwu dîyo. Ajîtasyon û trajedî kewtî têmîyan, eza ke programanê winasî ra hes nêkena, di deqayî kur-kur bermaya! Ey zî dî ke ez bermena, herhal weşê ci şi, zerrîya xwu akerde, behsê xwu kerd. Ey gore trajedîyo tewr gird amebi sereyê ci. Va "Mi cînîya xwu verada. Ez do newe ra bizewicî. Waştîya mi zî kuafor a. La birayê aye nêverdano ma biresê miradê xwu..."

Nîmeyê tiraşê mi qedênabi la ma bibî zey embazanê vîst serran. Vat "Eke ti misade bikerê, ez do inê derdan ser o cixareyêka qalinde bipêşî. Beno?"

Teeeeeeyyy teeeeyy! Qey nêbeno bira! Ez zî derdo winasî zana (la ez nêzana cixaraya qalinde merdiman dekena kamcîn hal). Ez nêşimena la meraq kena hela senîn a, boya ci senîn a, dûyê ci senîn o...

Westayê mi hema ez winî verdaya, kewt peyê perdeyê siyayî, şi peynîya dikanî, di deqayî kerd xişexiş. Ame ke cixaraya qalinde fekê ci de ya. Vat "Ti zî nêancenê?" Zerrî ra persa la nê, mi heta nika nêantbî û nîyetê mi zî çinê bi. Mi teşekur kerd, ey dewam kerd, ante. Çend deqayî dima mi dî ke zey serxoşanê fîlman winî giran, halê slow motion de qisey keno: "Erm... eeee... nî..." Fekê ci bi çewt, merdimî fam nekerdêne ke vatêne se. Mi dî eynî çiyan tekrar keno, mi weş goşê xwu da ci ke vano "Ez ermenî ya..." Mi va "Çiman ser, ez zî kurd a..." Huya. Ez zî bi huyayişê ey huyaya.

Heyatê mi di tiraşo tewr enteresan û derg bi, çewres deqayî dewam kerd la zirarê xwu çin o, porê mi weş qesna.

Çend rocî dima ez şiya tehtîl. Mi di hewteyî îzin girewtbi.  Ez ageyraya ke dikanê ci veng o! Mi beqalî ra persa, vat "Polîsan zere de vaş-maş û heb-mebî tepiştê. Ey zî vato ez nêroşena, şimena. Ceza nêgirota la mesela ra dima cayê xwu terk kerdo şiyo..."

Hîrê-çar aşmî dima, şanêk mi nizdîya mehlaya ma de o dî. Çend tenî embazê ci zî estbî, destê înan de şûşeyê bîra, verê dêsê mektebî de roniştbî şimitêne. Ez bi kelecan şiya ey het, mi selam da. Keyfê ci zaf bi weş, wurişt û ez zerrî ra verar kerda, ez maçî kerda. Vat "Nika ez dikanê inê embazan de gurwena. Embazî nîyê, zey birayanê min ê. Dikan filan ca der o, bê." Mi vat "Ez tiraşê to ra zaf memnûn a. Ez do meşte kar ra tepîya bêrî." Vat "Ez rayê to pawena, çiman ser."

Roca bîne ez şiya semto ke vatbi. Mi dikan dî. Embazanê eyê ke piya şimitêne ra yew zî uca bi. Selamuneleykum, eleykumselam. Mêrdekî kursiyêk îşaret kerde, va "Kerem bike." Xwura zere veng bi, mişterî çinê bî. Mi va "Filankes çin o?" Rîyê xwu kerd tirş, vat "Nê, tiya de kesêko winasî çin o." Hella hella! “Senîn çin o? Mi vizêr dî, camêrdî edresê inê dikanî da, xwura mi ti zî ey het dîbî."

Mêrdek hêrs bi, vat "Mi o gawir kar ra vet!"

Na xebere 1947 rey wanîyaya
No nuşte hema şîrove nêbîyo.