Behaneya Qiseykerdişê Tirkî

Keyê Hesan baw û kalan ra hur kird ê. Dewa înan de kirdkî ra teber tu lehçe yan ziwan qisey nêbeno.

Kênaya Ap Husê Keyê Hesan yew dewa Silîvanî de zewijêna. A dewe heme kurmanc ê. Kênaya Ap Husî her ke kurmanckî musena kirdkî kena xo vîr ra. Eke kurmanckî tam musena, kirdkî zî bin ra kena xo vîr ra.

Nê serranê peyênan dewlete dewê kurdan veşnayî, dewijan bar kerd şîy şaristanan.

Keyê kênaya Ap Husî zî bar kenê şinê Bursa. Kênaya Ap Husî Bursa de musena tirkî. La her ke tirkî musena kurmanckî kena xo vîr ra. Eke tirkî tam musena, êdî kurmanckî zî bin ra kena xo vîr ra.

Çendeyêk verê cû Ap Hus şino rehmet. Kênaya ey seba şînê babîyê xo Bursa ra yena dewe. Her kesî reyde tirkî qisey kena. Birayê aye bineyke hêrs beno vano:

- Herê ti çira kirdkî yan kurmanckî qisey nêkena, ti tirkî qisey kena?

Vana:

- Vallahi unutmuşum. Bilmiyorum. (Wilay mi kerda xo vîr ra. Ez nêzana.)

Birayê aye vano:

- Wakê, ti tîya ra şîya deşte, ti kurmanckî musaya, to kirdkî kerde xo vîr ra, to dest pêkerd ma reyde kurmanckî qisey kerd. Ma vengê xo nêkerd. Nika zî ti vana mi kurmanckî kerda xo vîr ra!...

Kênaya Ap Husî vana:

- Kardeşim, belki benim beynimde sadece bir dil kadar yer vardır. Ne yapayım, birini öğrenince diğerine yer kalmıyor. (Birayê mi, belkî mezgê mi de tena qasê ziwanêk ra ca esto. Ez se bikî, ez ke yewî musena ê bînî rê ca nêmaneno.)