zazaki.net
18 Oktobre 2021 Dişeme
Girdîya Karakteran : 12 Punto 14 Punto 16 Punto 18 Punto
21 Hezîrane 2021 Dişeme 11:24

Azraîl is coming

Evdî Hesqera

Nê! Postecî nêbî. Kincê ci zey unîformaya postecîyan nêbî. Kargocî zî nêbî. Eke merdimek fîrmaya kargo ra bêro helbet logo ra, rengê kincanê ci ra fam beno. Tîşortê ey siya bi. La merdimo ke bi meaşê asgarî şixulîyeno hendayê ci tirrek nêbeno:

-Keyeyê Xalis begî yo?!

-Nê.

-Tiya daîre 5 nîyo?

-E, la o merdo yanî.

-Nameyê to çi yo?

(Qelem vete ke nameyê mi binuso.)

-Lacê ci qato cor...

-Mi rê lacê ci macê ci lazim nîyo! Nameyê to çi yo?!

-Mêrdek şi rehmet, lacê...

-Ez vana keynaya ci, lacê ci lazim nîyo! Nameyê to çi yo?!

-Ti do se bikerê nameyê mi?

-Ez do binusî!

(Aha! Tebdîlê qiyafet edresanê miletî tesbît kenê!)

-Ez nameyê xwu nêvana. Eke ti wazenê lacê ci...

-Mi rê nameyê to lazim o!

(Paştîya ci de çente, destê ci de zerf estbi. Ez nêeşkaya biwanî hela zerfî ser o çi nusîyayo.)

-Nameyê xwu vace, ez do binusî! Inê daîreyî de kam îqamet keno?!

-Kes nêkeno...

-Ti?!

-Ez kirêcî ya. Dat Xalis wayirê inê daîreyî biyo, şiyo rehmet. Lacê ci...

-Ez do nameyê to binusî!

(Wulay do şewek bêrê mi bikişê! Nameyê mi kewto înan dest, nika yew erşawito ke biewnîyê raşt a, ez tiya der a, yan nê!)

-Hela nameyê xwu vace!

-Daîre veng o, ez çinê ya...

-Zerf, îade...

-Şireeeeeqqq!

 

Ez zey heran a! La laco, ino bajarê şarî de ti seba çi hende bêaqiltî kenê! Mehla de kam ke maneno, kurdê to şino ey het vanê "Xalo ti ça ra yê? Şima keyeyê xwu de bi Kurdî qisey kenê? Ganî qicê ma ino ziwan xwu vîr ra nekerê..." To rê çi! La to rê çi! Adir vareno, milet terseno... Of!

Gelo ê ça ra bi mi hesîyayê? Firine de? Nê! Wayirê firine tersek o. Her ke ez bi ziwanê ma çiyêk persena cewabo kilmek dano. Pêro vatişanê ci "Merheba, eywella, Allah razî bo..." Nê, bi hende çekuyan merdim deşîfre nêbeno...

Belkî marketê Mûşijan de bo! Wayirê ci vatbi "Ez Kurmanc nîya, ez Kurd a!" E wulay, beno ke ey het de bo! Ez zî bê dikanê ey cayêko bîn ra çiyêk nêgêna! Lacê ci yo tewr gird zî eynî zey pîyê xwu yo! Ey dir zî mi bi Kurdî zaf tereqna! La qicê bînî winî nîyê... Qico diyin tayê zano, yê hîrêyin çat-pat la merdim vano o tewr wirdî japon o... Of!

Berber! Aha, berber de biyo! Vat "Keko ti manenê Doguluyan...” Mi zî vat "Ez Dogulu nîya, ez Kurd a." Ti vanê qey mi may û cinîya înan vat, yê ke zere der ê, pêrûne sereyê xwu wedart zey dişmenan ewnîyayî mi ra. Temam! Berber de ez kewta lîsteya înan!

Do bêre! Ewro meşt do bêre wulay! Wa bêrê!

Hela ez keyberî kilît bikerî. Inê ra tepiya ez nêşena bivecî teber. Heq zano sereyê kuçeyî de pawenê! Himmm... Azraîl is coming... Wa bêro! Heta ke bêro, heta nefeso peyîn ez do xwu ver bidî! Himmm... Ez se bikerî? Merdim ino hal de eşkeno se bikero? Ez Youtube de heme vîdeoyanê bi Kurdî biecibnî, wa likeyê înan bibê zaf... Bi çiyanê şenikan dinya awan bena... Nê, reklam vîyareno...

Na xebere 447 rey wanîyaya
No nuşte hema şîrove nêbîyo.