zazaki.net
24 Teşrîne 2017 Îne
Girdîya Karakteran : 12 Punto 14 Punto 16 Punto 18 Punto
23 Teşrîne 2009 Dişeme 21:17

Adirê Eşqî

[Şîîre]
Xerîbzeman

I

Ez pîrê eşqî yo, derd û xemî embaz î mi rê

Ez yew mûm a, adirê eşqî taca sereyî ya mi rê

 

Karê eşqê to, zereyê mi de ax û wax î mi rê

Sey destana Ferhadî fekan de kilam î mi rê

 

Her kesî tepişto pêşê şêxî, yê meydarî mi rê

Her kes keyan de germ beno, kuçeyî zî mi rê

 

Mi ra persenî; nê kederî koca ra ameyî to rê

Nê kul û kederî, yara kiştoxe ra yadîgar î mi rê

 

Bi xem û keder naleyîş awa heyatî ya mi rê

Mîyanê adirê to de ciwîyayîş cara weş o mi rê

 

II 

A bêwefaye kamca mi bivîno nengan çînena mi

Nengê aye zaf medhîyan ra weşêr î, wa biçîno mi

 

Ez derdê eşqî çawa vaco? Qedyayî vateyê mi

Ya hekîm! Megêr, lamumkin o, çin o çareyê mi

 

Keywarê rindîye kesî rê payîdar nêmendo, gula mi

Sey bilbilî sewtê mi birîyayo, telîyê xo zî meke mi

 

Binê dêsan de eware mendo, têwmede derdê mi

Destik û peştgîrê min a, na şuşeyê şerabê mi

 

Dişmenanê mi reyde şimena şerabê gulrengî, yara mi

Waxto ke mi vînena, xo tadana, na kiştoxa emrê mi

 

III

Kulav dayo xo ra nê sofîyî, rîyê to çawa bivîno?

Roşnayîya tîncî de şewşewoke çawa seyd bivîno?

 

Şêx dekewto mîyanê çar dêsan, do çi bivîno?

Kerametî ha lewanê yare de, o do mewt bivîno?

 

Hafiz bêveng veng dano, vano qey beheşt bivîno

Sond bo! O do cehennem de awa ziqumî bivîno!

 

Bazirgan vêreyî hurneno, vano qey asanî bivîno

Heq ewlado xirab dano, o do ezabê qebrî bivîno

 

Emr kilm o, dinya fanî ya, kam çi vîno, çi nêvîno

Xerîbzeman vano: O ke aqil o, wa xo rê eşq vîno

Na xebere 2344 rey wanîyaya
No nuşte hema şîrove nêbîyo.