DIYARBEKIR DE EŞQ

Berê Koyî ra heta Berê Ruha

Gaman peymawena ez

Ver û verê bedenî de...

Vayêko honik yeno, vayê koyan

boya rîhanî tede

Bakur ra yeno, nermek...

Xuşşînî kewta pelanê çinêyeran ser

Valêrî porê xwu şane kenê vayî ver de

Xubêrî boyêka xumrî resnenê heme ca

Çîveçîvê meqesokan a, mîrçikî bi wîlewîl

Porê bedenî; çokêk vaş

Sereyê mi xwoş

Canê mi mest...

Xîyalê mi de abiyayişê vilêka sûre

Û serê engiştanê rojî ra ez

Sosinan çînena qevd bi qevd...

Tiya şerq o; Diyarbekir yanî

Şingeşingê tasanê sifrînan a

Awa sûsî roşeno Bavê Elo û keynekî tuyan

Lewê înan “qere hubur”

Dûyê kebabê cîgere vila beno

Binê ziwanê mi de tehmê çayêka qaçaxe

Û zincîya mi boya titûnê Helhelî ra pirrî

Ez tewirêna ya ewro; sermest

Zerrîya mi yew pirpirok a ewro

Rîyê asmînê nîlgunî de hewrê gulanî

Va dest dano hewran û yena war:

Reşêşêka werdî...

Dima, asmînê Diyarbekirî de

Keskesûre bena keman

Kerrayê dêsê bedenî sereşite

Awin-awin huyenê

Û kewe-kewe bereqîyenê pelê daran

Diyarbekir o tiya; heme ca rengîn…

Keynekêk wet ra yena; esmer-esmer

Çimê aye; miyanê zeytî de cotêk zeytûnî

Û lewanê aye ser o çilkê varite

Poro siya vayî ver de rewan...

Mîrçikî wanenê

Û ma, çimanê yewbînan ra awiran remnenê

Alişkanê ma de vilî abenê

Di zerrî: di pencerayê akerdeyî;

Di boranî sipî-sipî perrenê qefesan ra

Û ma çimanê yewbînan ra şerab şimenê:

-Noş!

-Noş!...

___________

Çime: Roşan Lezgîn, Dêsan de Sûretê Ma Nimite, Çapa diyine, Weşanxaneyê Roşna, Dîyarbekir 2013, r. 43-46