zazaki.net
03 Adare 2021 Çarşeme
Girdîya Karakteran : 12 Punto 14 Punto 16 Punto 18 Punto
09 Sibate 2021 Sêşeme 15:33

Hîrê kitabê ma metbea ra ameyî

Bi eno qeyde, benê dahewtay kitabî ke Weşanxaneyê Roşna ra weşanîyenê ke 62 hebê înan Kirdkî yê

Hîrê kitabê ke ma şirawitbî metbea, ameyî. Bi eno qeyde, benê dahewtay kitabî ke Weşanxaneyê Roşna ra weşanîyenê ke 62 hebê înan Kirdkî yê.

*Kitabo yewin yê Evdî Hesqerayî yo, kitabê hîkayeyan o. Kitab de 22 hîkayeyî estê. Evdî Hesqera kurmanc o, proseyê rojnameyê Newepelî de kirdkî mûsabi û dest bi nûştiş kerdbi. Eno kitab, kitabo yewin o ke hetê kurmancêk ra bi Zazakî nûsîyayo.

*Kitabo diyin, dîwanê diyin yê Mehdî Özsoyî yo. Eno dîwano diyin de şiîrê ke Şêx Mehdî weşîya xwu de kasetan de wendê ra ameyo pê. Dîwan de 126 şiîrî estê.

*Kitabo hîrêyin, derheqê heyatê hunermendê ma Seîd Altunî de yo. Seîd Altun Çewlîg ra, mintîqeyê Verardî ra, Lotan ra yo. Serra 1949 de ameyo dinya. Teyna mektebo verîn qedênayo. 1966 de dest bi vatişê deyîran kerdo. Roja 03.04.2018 de Diyarbekir de şi rehmet. Kitabê derheqê heyatê Seîd Altunî de, panc qisman ra ameyo pê: hîrê Qismanê sereke, Îlawe û Fotografî. Nûştox Qismo verîn de heyatê Seîd Altunî, mintîqe û dewa ey dano şinasnayiş. Qismo diyin de deyîranê Kirdkî tesnîf keno. Qismê hîrêyin de deyîrê ke Seîd Altunî kasetan de wendê yew bi yew neqil keno. Qismê Îlawe de di roportajî estê. Qismê Fotografan de zî fotografê derheqê Seîd Altunî de û yê albumanê ey estê.

Evdî Hesqera, Merhebaya Nîmeyê Şewe, Weşanxaneyê Roşna, Diyarbekir, 2021

Mehmet Mehdî Özsoy, Vengê Welatî, Weşanxaneyê Roşna, Diyarbekir, 2021, 256 rîpelî

Aydin Batur, Seîd Altun: "Emir Şi", Weşanxaneyê Roşna, Diyarbekir, 2021, 184 rîpelî

Na xebere 188 rey wanîyaya
No nuşte hema şîrove nêbîyo.