zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
07 Adare 2013 Panşeme 22:11

Heştê Adare

Bedrîye Topaç

Jehrêk gineno zerrîya camêrdêk ro

Yew jehro sîya

Yew jehro kiştox

Yew jehro nêrkî

Û vengê yew cinîke birîyeno cuye ra

Cuye rengê xo yo tewr rindek vîndî kena…

*

Embazê rayîrî, camêrd!

Ma bi yew qîrayîş yenîme dinya. Bermişê to, yê mi ra berz nîyo. Ez û ti qayîtê yew asmênî kenîme, pay nanîmê yew erdî ser. Yew cile de virar fîneme şewan ra, yew bêrîye ra şewdiran pawemê. Rîyê xo çarnenîme yew tîje. Ti bê mi ez bê to nêbemê.

*

Sêneyê mi de haştîye

Vengê mi de têduştîye

Pîzeyê mi de cuye pawena

*

Verê çimanê to de gonîya mi cemedîna. Ruhê mi sey awa royan herekîno cayanê xerîban. Her şewdir yew cinîye kişenê rîyê erdî de. Her şewdir yew vile herednenê koyan ra. Her şewdir parçe-parçe cuye kireşnenê goristanan. Bê bermiş, bê xatirwaştiş…

No heskerdiş nîyo. No eşq nîyo. No tena merg o. Keweno mîyanê min û to. Keweno mîyanê cinî û camêrdî…

Meke!

Merg yê ma nîyo.

Meke!

Porê mino derg qederê mi nîyo.

Meke!

Seba namusî mi mekişe.

Namus mîyanê gorimanê mi de nîyo!

Na xebere 1951 rey wanîyaya
ŞÎROVEYÎ
Yergin
Mehmed
Mamosta, weş û war be. To zaf weş nuşto.
Heştê adare, ke roja cinîyan ê dinya yo, heme cinîyan rê biba wesîleyê xeyr û weşîye.
08 Adare 2013 Îne 11:10