zazaki.net
18 Kanûne 2018 Sêşeme
Girdîya Karakteran : 12 Punto 14 Punto 16 Punto 18 Punto
18 Temmuze 2018 Çarşeme 16:47

DÎSA ra yewna kitabê kirdkî

Enstîtuya Cigêrayişanê Sîyasî û Sosyalî ya Diyarbekirî (Diyarbakır Siyasal ve Sosyal Araştırmalar Enstitüsü - DİSA) hetanî nika 10 neşrîyatî bi kirdkî weşanayê...

Enstîtuya Cigêrayişanê Sîyasî û Sosyalî ya Diyarbekirî (Diyarbakır Siyasal ve Sosyal Araştırmalar Enstitüsü - DİSA) ra bi nameyê “Prosesê Şerî de Desteko Psîko-Sosyal, Nimûneyê Sûrî û Baxleran, Vera Trawma de Muqawemetê Tutan” yewna kitab bi kirdkî vejîya. Kitab, sey parçeyê projeyê "Challenging Trauma of Children in Conflict Zones" ke hetê Sefaretxaneyê Hollanda yê Tirkîya ra ameyo destekkerdiş amade biyo.

Seke yeno zanayiş, cayo ke tede şer û pêrodayiş bibo de tutî hem mirenê hem kewenê trawma hem zî benê şahidê trawma. Bawerîya tutan şikîyena û derheqê îstîqbalî de xeyal û hêvîya xwu kenê vîndî, netîce de heyatî dir têkilîyêka problemine nanê ro. Seba başkerdişê enê tesîranê negatîfan yê fîzîkî û psîkolojîkî DÎSA bi hemkarîya madî û teknîkî ya gelêk dezgeyan mabeynê kanûnê verîn 2916-kanûnê verîn 2017 de Diyarbekir de sey proje semedê tutanê ke demê şerî de marûzê trawma bîyê yew xebata destekê psîko-sosyalî kerde. Eno kitab hetêk ra raporê ena xebate yo la esas derheqê trawma û xebatanê vera trawma de sey qlawuzî yo. Kitab hîrê beşan ra yeno pê. Beşê yewin de; sey analîzkerdişê xebata destekê psîko-sosyalî çarçewaya termînolojîke dîyar bena. Beşê diyin de, xebata destekê psîko-sosyalî ya seba tutan ameya erjnayiş. Beşê netîceyî de zî, şertê xebata ke ameya kerdiş, çarçewaya prosesê şerî de ameyê erjnayiş û pêşnîyazî vejîyayê meydan.

Kitab bi tirkî amade biyo la tercumeyê înglîzkî û kurdkî (kurmancî û zazakî) biyo. Kirdkîya kitabî hetê Roşan Lezgînî ra amade bîya. Seke texmîn beno, waranê îlmî yê sey psîko-sosyalî û terapîyê hunerî yê trawmatîkan de şixulnayişê kirdkî zaf zehmet o. Eno het ra, yanî bi eno qayde ceribnayişê ziwanî averşîyayişê kirdkî de zaf muhîm o.

Enstîtuya Cigêrayişanê Sîyasî û Sosyalî ya Diyarbekirî (Diyarbakır Siyasal ve Sosyal Araştırmalar Enstitüsü - DİSA) 08.03.2010 de ronîya û çarçewaya meseleyê kurdan de, warê sosyalî, sîyasî, ekonomîkî, ziwanî û kulturî de cigêrayişan kena û seba ke pêardişê polîtîkayan ser o tesîrêk bikero netîceyê xebatanê xwu hawayê kitabî yan zî broşur rayêpêroyî rê îlan kena.

DÎSA hetanî nika enê 10 neşrîyatî bi kirdkî weşanayê:

- Perwerde de Tetbîqê Ziwanê Dayîke (meqaleyî), Tirkî ra çarnayîş: Roşan Lezgîn, Weşanê DÎSA, Dîyarbekir 2013, 30 rîpelî

- Polîtîkayê Zafziwanîye û Plankerdişê Ziwanî (meqaleyî), Tirkî ra çarnayîş: Roşan Lezgîn, Weşanê DÎSA, Dîyarbekir 2013, 30 rîpelî

- Rêberê Bikarardişê Setê Gulgulînê Gedeyan (qilawuzê perwerdeyî), Kurmanckî ra çarnayiş: Roşan Lezgîn, Weşanê DÎSA, Diyarbekir 2016, 54 rîpelî

- Heş û Luye (sanike), 20 rîpelî

- Luye û Zerrece (sanike), 12 rîpelî

- Namey Kamî Kotî yo (sanike), 20 rîpelî

- Vergo ke Xo Şêr Vîneno(sanike), 24 rîpelî

- Voreke û Verg (sanike), 12 rîpelî

- Wa Pêro To rê bo (sanike), 16 rîpelî

- Prosesê Şerî de Desteko Psîko-Sosyal, Nimûneyê Sûrî û Baxleran, Vera Trawma de Muqawemetê Tutan (cigêrayiş), Tirkî ra tercume: Roşan Lezgîn, Weşanê DÎSA, Diyarbekir 2018, 142 rîpelî

Na xebere 720 rey wanîyaya
No nuşte hema şîrove nêbîyo.