zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
21 Oktobre 2021 Panşeme 08:21

Diyna Kitabê ma Şiyî Metbea

Weşanxaneyê Roşna ra diyna kitabê ma şiyî metbea. Bi eno qeyde, pêro piya benê 72 kitabî ke 2 bi Tirkî, 6 bi Kurmancî, 64 bi Kirdî yê.

Weşanxaneyê Roşna ra diyna kitabê ma şiyî metbea. Emser benê 7 kitabî ke ke Weşanxaneyê Roşna ra weşanîyenê. Bi eno qeyde, pêro piya benê 72 kitabî ke 2 bi Tirkî, 6 bi Kurmancî, 64 bi Kirdî yê.

Kitabo verîn roman o. Nuştoxanê ma yê hepsîyan ra Huseyîn Karakaşî nuşto. Eno beno kitabê şeşin ke Huseyîn Karakaş hepisxane ra nusneno. Nameyê romanî “Çê Qemerê Kejî” yo, 184 rîpelî yo. Nuştoxî romanê xwu rê mintîqeyê Qerebêlî ra cûya trajîke ya yew keyeyê edetî kerda babete. Dewro klasîk de yew keyeyo karker ke hêgayanê xwu de sey morceleyî xebitîyayne û nanê xwu kerra ra vetêne, eynî wext de meymanperwer û nandar ke her kesî mird kerdêne, labelê hem tayê xûyê wuşkî yê dewijane ver, hem zî terteleyî û hereketê siyasî ke biyîê miseletê koyanê welatî, senî teber ra cûya înan serûbin kerda û keye ver bi wêrankerdiş şiyo teswîr keno.

Kitabo diyin hîkaye yê, dosyaya Evdî Hesqerayî ya. Nameyê kitabî “Lîtreya Sayan Çend Lîra ya?”, kitab 64 rîpelî yo û tede 25 hîkayeyê kilmekî estê. Emser benê di kitabê nuştoxî yê hîkayeyan ke weşanîyenê. Çiyo muhîm hîkayeyê ey teqlîdî nîyê, yanî sey zafê nuştoxanê hîkayeyan sewbîna nuştoxan teqlîd nêkeno yan zî cûya dewe ra hîkayeyanê haziran nênusneno. Bi terzê xwu, bi yew awiro kirîtîk, cûya şaristanan ra, hîkayeyanê kilmekan mûneno ke merdim vîstikêk de bi tebesum waneno.

Derheqê Evdî Hesqerayî de yew çiyo bîn ke merdimî zerrweş keno eno yo. O bi xwu, mintîqeyê Semsûrî ra kurdanê kurmancan ra yo, labelê proseyê rojnameyê Newepelî de Kurdîya Zazakî mûsa û bi wendişê metnan Zazakîya xwu aver berde, peynî de dest bi nuştiş kerd û dewam keno.

Zafê kitabanê ma yê ke Weşanxaneyê Roşna ra weşanîyayê de keda kurdanê ma yê kurmancan esta. Mesela, her di qapaxê enê kitabanê ma birêz Dawud Özalpî û xanima xwu Aysele pêardî. Fotografê qapaxê kitabê Huseyîn Karakaşî yê kurdanê ma yê kurmancan ra Nîzamedîn Pirinççioğluyî yo.

Huseyîn Karakaş, Çê Qemerê Kejî, Weşanxaneyê Roşna, Diyarbekir, 2021, 184 rîpelî

Evdî Hesqera, Lîtreya Sayan Çend Lîra ya?, Weşanxaneyê Roşna, Diyarbekir, 2021, 64 rîpelî

Na xebere 3043 rey wanîyaya
No nuşte hema şîrove nêbîyo.