zazaki.net
20 Oktobre 2017 Îne
Girdîya Karakteran : 12 Punto 14 Punto 16 Punto 18 Punto
06 Tebaxe 2009 Panşeme 01:12

Delala Çimrengîne rê Qesîdeyî

[Daşinasnayîş] Roşan Lezgîn
Zulkuf Kişanak: Delala Çimrengîne rê Qesîdeyî

Delala Çimrengîne rê Qesîdeyî

“Delala Çimrengîne rê Qesîdeyî” nameyê kitabê şîîran ê Zulkuf Kişanakî yo. Kitab hetê Weşanxaneyê Vateyî ra 2007 de Îstanbul de ginayo çape ro û 96 rîpelî yo.

Zulkuf Kişanak 1967 de dewa Kerteş a Sêwregi de ameyo dinya. Unîversîteyê Marmara de qismê Rayberî û Şêwirmendîya Psîkolojî (PDR) wendo. 1990 ra nata rojnamegerîye keno; hem bi tirkî û hem zî bi kurdkî (kirmankî û kurmanckî) nuseno. Yew kitabê ey ziwanê tirkî de bi nameyê Yitik Köyler 2004 de hetê Weşanxaneyê Belge ra vejîyayo.

Zulkuf Kişanakî bi na şîîra xo (Delala Çimrengîne rê Qesîdeyî) serra 2004î de Musabeqeya 12. ya Şîran a Hüseyin Çelebi de xelata yewine girewta.

Heme şîîrê nê kitabî se “Qesîde” ameyê namekerdene û sey “Qesîde-I, Qesîde-II…” dewam kenî hetanî “Qesîde-XIII”. Dima ra yew şîîra “Arisîyayene”, naye ra dima zî “Qesîdeya Peyêne” esta.

Bêguman edebîyatê kirmanckî rewna didanê şitî vetibîy; sere de Xasî, dima ra çendnayê bînan. Û helbet mamostayê ma Malmîsanijî hewikî kerdî sere ro. Dima ra kankirî, didanê kursî vejîyay; heme sey sedefan, sey mircanan. Û nê şîîrî, şîîrê Zulkuf Kişanakî didanê kursî yê. Kokê înan xorîn de yo.

Şîîrê Zulkuf Kişanakî sey vengê awa royanê welatê ma zelal û sey rengê koyanê welatê ma esîl ê. Zulkuf vano:

 

“…

Dereyê Laçî

û Çimeyê Halborî ra nat a û wet a

se ke mi vat, cinîyan pa domanan a

xo eştê Munzurî mîyan, sey qîyametî

wexto ke Yûsifan, Qoçan

û Şêx Hesenan zî kerd el-aman

û tirkî tîya ra

na newala pîroze ra ravêrdî, veracor

vera Pulemûrîye

û Koyê Munzur Bavayî

 

se ke vanê

vengê Xidê Memkî nêkewto cêr, asmênî ra

hêna hetê Çime û Koyê Mewlî ra yeno,

wexto ke kes goşê xo dano Heqî

û Munzur Bavayî

qîrî kewna goşan, qîrîya Xidê Memkî

Pîlvengî ra tepîya

Borgînî û hetê Demenan ra nat a

 

a roje

roja ke pêro camêrdî

qelenderî

ganfîdayî

şerwanî

û Seyîd Rizayo kurd Halborî de amey pêser

nê kerrey

kerreyê ke terteleyê Dêrsimî ra sêkur mendî

xo hêl kerdî a roje

a roja ke roj sewbîna akewt

sanikî sewbîna amey nuştiş

û şewqê xo da tarîxî

delalê

 

û delala çimrengîne, eşqa girde

tîja min

…”

Zulkuf bi destê wendoxê gêno, welatê ma ra çarneno. Zulkuf vengê awa zelale ya koyanê Kurdistanî reyde bi ziwanê ma yo şirîn şîîran waneno. Eke şima peyê xo nêdê nê vengî; şima peyê xo nêdê ziwanê baw û kalan, heme royê nê welatî, heme koyê welatê ma, do rîyê şima de bihuyê, bi hîris û di didanan…

Amadekar: Roşan Lezgîn

Na xebere 2984 rey wanîyaya
No nuşte hema şîrove nêbîyo.