zazaki.net
23 Tebaxe 2017 Çarşeme
Girdîya Karakteran : 12 Punto 14 Punto 16 Punto 18 Punto
16 Nîsane 2012 Dişeme 09:15

Zanayîşê Dakila Mi!

Şeyda Asmîn

Ewro asmên murizin o. Mi de nêhuyeno. Tîje kî miradîyaya. Ewro xo nêmusnena mi. Xora tawê aşma zerde nîyo ke a mi rê to ra xeberêk bîyaro. Nê nê, astareyê şuwanî hona her şewe mi de qesê keno. Ez to rê selam ruşnen. Ma ti cêna? Ya ti kî miradîyaya? Ya ti asmên de nîyanêdana? Ya lewê to de astareyî nênê zon, to de mi qesê nêkenê?

Îndî bes o dakila m’. Îndî mezîbe. Îndî ezab meonce. Îndî a zerrîya xo ya barîye tayê biarisne ra. To a zaf qefelna. To a kerde page. To a kerde xirba peyê çeyê ma. To a kerde warê kanî. To a kerde mezela Sena bêwayîr û teynaye ya gilê Kemerê Sîyayî. Aye bi awa varanê Koxe honik bike. Adirê aye îndî bişayne xow ra, adirê locina ma meşayne xow ra. Ti adirperestêk bîya… To nêverdayênê ma tuyê adirî bikerîme yan ma awe biverdîme adirî ser. Ma na xuya to zanitênê, ca-ca seba ke to biqarnîme, ma tuyê soba kerdênê. Ti bîyênê xêx. To tawuke kerdênê mîyanê adirî, kerdênê sûr zeyê henare. To vatênê eke şima hînî bikerê ez şima dax kena! Ti Zerdeştî bîya. Ez îndî zanen. Ti Zerdeştî bîya. Adirê to amebi tirtene. Ti bê adirgane mendbîya. Ê adirganê ke gilê koyan de hetanî şodir adir tede vêşayênê, tayênan ê kerdîbî xirab. Adirê înan şaynaybî xow ra. Coka ti hînî qehroke bîya. Ti hînî hêrsine bîya.

Zanayîşo ke to zanitênê, Heq kî camerd bî. To bi nê çekuyan îfade kerdêne. Taybetî kî tawo ke ti qarîyayênê, to vatênê, “Ax Heqo Heqo! Ma ti kî camerd nîya? Ti destê mi kewtênê, mi ti weşa-weş biwerdênê.” Mi newe fam kerd ke o hêrsê to rojane nêbî. Bi a vîste ra sîndor nêbî. To rind zanitênê ke mordemîye kotî de kerdo vîndî.

To zanitênê ke cuye to ra ameya tirtene. Ax dakila m’ dizdî hînî zaf ê ke. Dizdê cuye! Wayîra cuye ti bîya. Labelê bê bivîne ke çi heqê to çîn bî. Her çî bi keda çareyê to virazîyayênê labelê a tewr feqîre, tewr bêheqe ti bîya. Oxro ke to zanitênê û to bi nê çekuyan vatêne, “Emego ke mi şima ver de werdo emego tal o.” To reyna kî fek ci ra vera nêdayênê. To reyna kî arêyê cuye çerexnayênê. To awa ê bi hermanê xo ontênê û to nêverdayênê o vindêro. To hertim o çerexnayênê. Genimê ê kî bi destanê to amayênê. O genimo qemer. Arêyê to de bîyênê ardî, bi destanê to yê zivran serê sacî de amayênê potene û amayênê serê sifreyê ma. Senî kî weş bî dakila m’. Senî kî weş bî.

Zanayîşo ke ez kî zanen çik o, ti zana dakila m’? Nîya ameyo nîya nêşono!…*

Çile 2012

_______________

*No nuşte, “Newepel, Rojnameyo kulturî yo 15 roje, Hûmare 23, Dîyabekir 16-29 sibate 2012, r. 5” de weşanîyayo.

Na xebere 1289 rey wanîyaya
ŞÎROVEYÎ
Şewçila
Zerweş
Humara 3 û 4 ya Şewçila hîna nêameya Meletî!Eke na derheqe de yarmetî bidîn do zehf hol bo!Yew zî eke humara yewine ya Şewçila ra yew heb seba mi bişawîn zehf memnûn,eke ney ganê şima weş!Zehf sipas û her war û weşîye mîyan de bîn!
Merheba bira,
Ma destpêk ra hetanî ewro hertim rojnameyê Newepelî û kovara Şewçila şawenê Meletîya. Ma Zelal Kirtasîye rê şawenê.
Labelê hetanî ewro Zelal Kirtasîye yew quriş pere nêdayo ma.
Ma çend rey waştê zî ancî nêdanê.
La hewna zî ma seba wendekaran hertim rojname şawenî.
Eke to rê zehmet nêbo ti adresa xo newepel@hotmail.com rê bişawe.
Ez birayê xo rê heme hûmaranê Şewçila şawena.
Zaf selamî...

17 Nîsane 2012 Sêşeme 02:10