Xiziro Zemane!

Rojêk yew dizd kuçûn di gêreno. Vêşûnê ver perîşûn beno. Xwu rê vûno “Eke emşo zî ez destveng agêro keye, siba tirmê mi hewanîyeno.” Yew vano ti vêşûn î! Çimî bên sey saete, keye bi keye sey sowqî gêreno. Keyewo yewendesin xwu ra pey verdûno, reseno keyewo duyesin. Eke wayerî keyî û pa kulfetê xwu ya ha vejîyenê teber. Kê vûnî qey dizdî rê lêl-qedir akewta, fek şonû peyê goşû. Pey qestikî xwu linga gêreno la senî wayerê keyeyî çimûn ra bên dûrî, dizd xwu lujin ra deverdûno zerê keyeyî. Yew nêvaj ti dizd î!

La hama nêeşkayo çiyêk bitirawo, cenî agêrena keye. Dizd xwu erzeno peyê perdeyî. Cenîki oda ra binê perû gêna û agêrena ki vejîya teber. Ti mevaje ke yewna dizd fekê berî de cenî tepîşeno û xwu erzeno destûnê cenî. Tam perûn aye ra gêno, dizdo ke ha peyê perdî di, xwu erzeno dizdê bînî ser. Çend hebî lapatû dûn purî. Dizdo bîn vûno qey mêrdeyê cenî yo. Ta nîno ke vazdo biremo. Cenî ewnîyena dizdo verîn ra, vûna qey Xizir o. Vûna “Xoca Xizir, ti ma ser ra kêm nêbî. Eyla ti perû zî nîgênî ez bido to.” Dizd vûno “Ma sey ver nîyî. Ti bidi, deray ma gênî yan nêgênî.” Û destê cenî ra perû gêno vejîyeno teber. Cenî dima şaş mûnena, vûna “Wilay Xocewo Xizir zî hermîyewû!”