Vateyê Deyîran

VATEYÊ DEYÎRAN

Roşan Lezgîn

Deyîre - I

EŞQÊ CIWANÎYE

Adir kewto sêncê rezan, wey li min o

Dayê wilay kile şîya gilê gazan

Hawar gidî mi va ez xeşîm a, ez nezan a

Dayê rebenê sere û zerrîya m’ pîya dejenê

Hewal çî yo, ez nêzana

Lê lê dayê ez nezan a, ez nezan a

Hewal çî yo, ez nêzana

Adir kewto sêncê baxça, wey li min o

Dayê wilay na zerrîya m’ sey mîrçik a

Hewar gidî mi va çi wanena, ez nêzana

Dayê rebenê ez qicek a, ez naşîn a

Sebeb çî yo, ez nêzana

Lê lê dayê ez nezan a, ez nezan a

Sebeb çî yo, ez nêzana

Adir kewto sêncê hêgî, wey li min o

Dayê wilay mi tewe girewta, tewa mergî

Hewar gidî qey mi werdo vaşê bengî

Dayê rebenê sereyê m’ dejeno, zerrîya m’ jan a

Derman çî yo, ez nêzana

Lê lê dayê ez nezan a, ez nezan a

Derman çî yo, ez nêzana

*        *       *

Deyîre - II 

ÇÎ RÊ TI NÊNA

Ti keyna derg û barî

Lewtenika vengmarî

Bê to menda ez tenê

Roj û şewê m’ bîy tarî

Çî rê ti nêna emrê mi

Çî rê ti nêna ruhê mi

Pawey to mendê destê mi

Gul-sosinî abîyê

Bi yewbînan şa bîyê

Zerrîya m’ bê derman a

Ewro keyna ti nîyê

Çî rê ti nêna emrê mi

Çî rê ti nêna ruhê mi

Pawey to mendê destê mi

____________

Not: Mi vateyê nê deyîran serra 1999 de nuştibîy. O wext ge-ge mi xo rê yew meqam de vatêne. Wextêk mi bi e-mail deyîrbazê ma yê erjaye Mehemed Akbaşî rê şawitî. Dima îrtîbatê ma birîya. Coka ez nêzana hema zî destê ey de estê yan ney. Badê ke mi şawitî, mi vindî kerdî. La vizêr mi yew dîsketê kehnî de newe ra dîy. Nika ez weşanena. Belkî deyîrbaz yan zî kesê ke muzîkê ma reyde eleqedar benê, bi yew şîroveyê neweyî bikê muzîk.