zazaki.net
20 Tebaxe 2017 Yewşeme
Girdîya Karakteran : 12 Punto 14 Punto 16 Punto 18 Punto
13 Temmuze 2012 Îne 08:23

Tuşkeki*

Zerîn Azrawa

Yew pîri bena, tim û tim goreyê yew mîrçiki xu tîyedûna, hazir kena, şina ware. Mîrçikê pîri key gi halînê xu viraşt û hak kerd de, ya zî cadi şina ware.

Yew serri hewa zaf weş vîyaren ra, mîrçiki zî verê wextî halînê xu virazena û hakûn zî kena de. Pîri senî g’ vînena mîrçiki halînê xu viraşt û hak zî kerd de, pîri xu çînena we, xu kena hedre, kuwena reyar gi şîyor ware.

Reyar ra yew dewij pîri ver a ben, von:

- Pîrê hama rew o, meşo ware, hama waxtê wareyî zaf mendo, ti şina xeniqîyena!

Pîri vona:

- Ti sey mîrçikê mi hol zûnî! Mîrçikê mi halînê xu viraşt, hak zî kerd de, ez tim goreyê mîrçikê xo şona ware.

Dewij kuwen pîri lîyak, nikuwen pîri lîyak, pîr anigeyrena.

Pîri şina ware, hama yew hewayo zaf weş esto, pîri bena şa, keyf kena û vona:

- Ez tûşk o, o tûsko let o.

Ez mîyonê birr û birr geyreno.

Tîzon û fişonê xo edar û sibatî pîya verdeno...

Pîri hama inê qalî ha fekê ya di, beno puk, beno xedeb, yew firtone non pa, weliki vay dûno, zaf beno serd. Pîri cadi kuwena bîn lênê toraqî, kulikê pîncê lênî ra hewa şino zere. Pîri o yo g’ nixeniqîyena.

Vori edîlyena, pîri zî nêmxeneq binê lênî ra vecîyena g’ çi bivîno! Pîyorê tûşkê ya xeniqîyayê, tenya yew sax mando. Pîri ê tûşkê xo gêna hetê dewa xu wa kuwena reyar.

Pîri yena resena verê halînê mîrçiki, ewnîyena g’ mîrçkê ya zî pelî kerdê a, serê halînî de bîya rep, cemidîyaya.

Ina rey pîri erzena mîrçiki ser û ûna vona:

Çuçika min a çiçkanî

Ti hal û hewalê zivistanê nizanî

Te mala xwe xirab kir

Mala mi zî ser de danî.**

 

________________

* Tûşkeki, aşma edarî di yew roj a. Verînûn ma goreyê teqwîmê tebîetî hereket kerdîn.

**No nuşte “Newepel, Rojnameyo kulturî yo 15 roje, Hûmare 28, Dîyarbekir 01-15 gulane 2012, r. 6” de weşanîyayo.

 

Na xebere 1493 rey wanîyaya
No nuşte hema şîrove nêbîyo.