zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
04 Tebaxe 2012 Şeme 00:02

Ti Sey Asmênî ya

Adir Dêrsimij

Ez newe vejîyaya zere ra

Desin de mi vazda, xo eşt daristanan

Rindek û giran meredîyaya vaşî ser o

Yew hetê mi de xuşayîşê awe yeno

Yew hetê mi de vayode honik vaydûno ra

Goşanê mi de sewdaya to ya xoşekaye.

Mi rîyê xo çarna bi asmênê keweyî

Cor de çim şikit mi ra tîja şîrine

Çimê to bilîşkîyay orteyê hewran de

Dima şilîya to varaye dinyaya mi de

A game vilî bîyî ra cîgeranê mi de

Per û payanê mi qewete girewte a game

Perrayî ra fîkrê mi xeyalanê to de

Sewbîna ez çi wazena Heqî ra?

Ebi to germin o, meşo zerrîya mi ra

Çimê to pencaraya odaya mina tarî yê

Rîyê to bereqîyayîşê awa zelale yo dinyaya mi de

Ti sey asmênî bêpeynî ya û rewayîşê weşî ya

Şîyayîşê to, çînbîyena to, merdena min a

Ti ke nêzdîye mi der a, roşt çimanê mi der o

Çike ez bê to nêbena, ez ti ya

Ti ke esta, ez kî estone, ez çimanê to de bereqîna

Pita mi ez sewbîna çi wazena Heqî ra?*

___________

* Na şîîre “Newepel, Rojnameyo kulturî yo 15 roje, Hûmare 29, Dîyarbekir, 16-31 gulane 2012, r. 6” de weşanîyaya.

Na xebere 3099 rey wanîyaya
No nuşte hema şîrove nêbîyo.