Teşekurê Ap Husî

A serre ko ra cinawirî nanê her di gayanê Ap Husê Keyê Hesan dima, gayî zinar ro lêr benê, mirenê. Destê Ap Husî binê çengan de xo rê miheyr maneno.

Payîzî rewa şina, wextê citan beno. Dewijî xo rê hêgayanê xo tov kenê, cita xo kenê. La Ap Hus gayan ra miheyr mendo, nat û wet keno, kes gayanê xo nêdano ke Ap Hus zî xo rê cita xo bikero.

Badê ke cita Hecî Mehmudê Gule qedêna, gayanê xo emanet dano Ap Husî.

Hîna ke vewre nêvaraya, Ap Hus lez keno, hêgayanê xo hemîne tov keno, cita xo temam keno. Zaf keyfê ey yeno, hende keyfê ey yeno ke, gayan dima reqesêno yeno hetanî bi dewe.

Ap Hus gama ke şan de gayan ano teslîm bikero, a esna de Hecî Mehmud zî ha serê endelîye de desmajê mexrebî gêno. Ap Hus xo rê xo de vano, ez Hecî Mehmudî rê senî teşekur bikerî, ez senî vateyêko meqbul vajî ke herinda na holîya ey bigêro. Keno nêkeno tu çîyê nêno bi vîrê Ap Husî. Vano:

- Hecî Mehmud, wilay ez çi vate zî vajî, ez senî teşekur bikerî zî cayê na holîya to nêgêno. Ez nêzana çi vajî. Başe a ya ke ez vajî her di dadîya to no!