zazaki.net
28 Adare 2024 Panşeme
Girdîya Karakteran : 12 Punto 14 Punto 16 Punto 18 Punto
28 Kanûne 2016 Çarşeme 14:39

Sey Homayî Barekerdiş

Roşan Lezgîn

Ap Husê Keyê Hesan nêzdîyê mergê xwu, wazeno mal û milkê xwu tutanê xwu rê bare bikero.

Venga rîsipîyanê dewe danê, cemat yeno pêser. Ap Hus vano:

- Ez sey Homayî bare bikerî yan bi edetê biratî?

Tutê Ap Husî ewnîyenê yewbînan ra, ewnîyenê cematî ra. Vanê:

- Bawo, wa sey Homayî bo.

Ap Hus vano:

- Temam. Rez û baxçe û hêgayî Evdî rê. Ga û manga û golikî û pes Seydî rê. Lên û satil û goçînî û derzînî Elî rê. Selî rê çîyêk nêmend.

Cemat zî tutî zî heyret manenê. Vanê:

- Bawo, ma va sey Homayî bare bike. Eno senî barekerdiş o?

Ap Hus vano:

- Eyla şima nêvînenê Homayî senî mal dayo însanan! Tayê nêzanê senî biwerê, tayê zî çin o ke biwerê.

Tutî vanê:

- Bawo qurban, ma poşman bî. Ti sey birayan bare bike.

Na xebere 4255 rey wanîyaya
No nuşte hema şîrove nêbîyo.