zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
03 Oktobre 2009 Şeme 09:20

Roja ke mîyanê rojan de çin a!

[Mesela]
Hemîd Hozan

Rojêk Suleyman pêxamber (sHs) wezîr, heval û memuranê xo ra vano:

- Zerrîya mi wazena ez rojêk bê derd û xem bimanî. Ez bi sereyê xo tena, boya xo bidî, îsrehet bikerî.

Wezîr û memurê ey vanî:

- Roja ke ti wazenî wa hema meşte (siba) bo.

Beno siba, Suleyman pêxamber gopala (çogane) xo gêno û bi tena sereyê xo şino dewa xo. Wazeno ke tepî û repî ra dûrî, bê kul û teşqele rojêk boya xo bido. La ewnêno xortêko cilsipî û nenas vejiya ame. Xorto nenas Suleyman pêxamberî ra vano:

- Selamê Homayî to rê bo, ey pêxamberê Homayî!

Hezretî Suleyman zî vano:

- Selam to rê bo zî, xorto, ti kam î?

Xort vano:

- Ey pêxamberê Homayî, ez o kesa ke, kêberî mi rê nînê girewtiş û çiyêk mi rê asteng (engel) nêbeno. Ez beg û paşan ra nêtersena, koşk û qesrê ke ez bikewî miyan bêwayîr manenî, keyeyo ke ez şêrî ci cinazeyî ci ra vecyenî.

Êdî Suleyman peyxamber mêmanê xo yê nenasî nas keno, vano:

- Ey Ezraîl! Ti ameyî semedê serweşî yan gangirewtişî?

Gangêr vano:

- Ez ameya ganê to bigêrî.

Hezretî Suleyman gazin keno, vano:

- Ey Gangêr! Mi va ez eyro rojêk bêderd û kul derbaz bikerî. Heywax mi rê! Derdo gird (pîl) ame mi sere.

Gangêr vano:

- Ey pêxamberê Homayî, to wina yew roje waşta ke, a roje miyanê rojanê dinya de çinê ya, to rojêka nêbiyayîye waşta. Bi qederê Homayî razî bibe.

Gangêr nê vateyan dima ganê Suleyman pêxamberî gêno.
Na xebere 3581 rey wanîyaya
No nuşte hema şîrove nêbîyo.