zazaki.net
29 Adare 2024 Îne
Girdîya Karakteran : 12 Punto 14 Punto 16 Punto 18 Punto
14 Hezîrane 2010 Dişeme 08:56

Koleyo Fekboyin û Koleyo Zereboyin

[Mesela]
Arêkerdox: Xerîbzeman

Rojêk padîşahî di koleyî erînayî. Nê koleyan ra yew rindek bi. Dindanî fekê ey de sey încîyan beriqîyayni, nefesê ey ra boya gulan ameyni. O bîn zî pîs bi. Dindanê ey heme puç bîbî, nefesê ey ra boya mirdarî ameyni.

Padîşahî koleyê rindekî rê hedîyeyî ronayî û seba şitişî erşawit bi hemam. Û veng da ê koleyê dindanpuçê fekboyinî û va:

- Ê embazê to derheqê to de çîyê xirabî vatî, xuyê to yê nebaşî mi rê qal kerdî. De hela ti zî qalê embazê xo mi rê biki.

La nê koleyê fekboyinî derheqê embazê xo de qet çîyo xirab nêva. Ser o zî embazê xo bi keyf û eşq medh kerd. Padîşahî se kerd-nêkerd nêeşka nê koleyê fekboyinî ra seba embazê ey çîyo xirab bieşnawo.

Tayê wext ra pey o koleyo rindek hemam ra ame. Padîşahî seba îmtîhanî veng da ey û va:

- Maşala! To rê sihet bo. Ti çiqas bî delal û weşik. Wereka ê xuyê xirabê ke embazê to mi rê qal kerdî to de çin bîyêne.

Naye ser o koleyo rindek hêrs bi, kef fek ra ame û derheqê embazê xo de aver-tepîya qisey kerd. Her çi qalî xirabî estê, pêru embazê xo rê rêz kerdî.

Padîşah xebardayîşê koleyê rindekî ra aciz bi, o vindarna û va:

- Hinî bes o! Mi cewherê şima her diyan zî fehm kerd. Belê! Boye fekê embazê to ra yena la yê to, zereyê to bîyo boyin. Îta ra pey ti binê emrê ê koleyê fekboyinî de şuxulênî. (*)

_________

(*) Zemanêk ez Îzmîr de înşaat de xebetîyayîn, uca yew bekçîyê ma estbi, Mûş ra bi. Bi xo tirkmen bi la zazakî û kurmanckî hîna weş zanayne, mi ey ra vatîn “Ap Ezîz”. Merdimêko xemgîn, mutewazî û zanaye bi. Şewe ra şewe ma rê meseleyî qal kerdîn. Mi na mesele fekê ey ra eşnawite. Nê hawa çend meseleyî hîşê mi de mendê. Nika merdo. Homa ey bi rehma xo şa bikero.

Na xebere 3526 rey wanîyaya
No nuşte hema şîrove nêbîyo.