zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
29 Gulane 2020 Îne 09:35

Huyayiş

Evdî Hesqera

Ez wenişta otobuse ke şirî firokxane. Mi verê camî de kursîyêko minasib zî dî. Hewt tenî zî Ayetel-kursî...

Otobuse çend rey vinderte, raywanê neweyî weniştî. Mêrdekêko çewres û panc-pancas serre ame mi het.

- Misade esto ez ronişa?

- Estexfîrulah, kerem bike.

- Eywela... Ma va merheba?

- Merheba, çiman ser.

- Heqê otobuse çend lîra yê, bira?

- Yewendes o keko, miawîn do çend deqayî dima bêro bido arê.

Mi dî mêrdekî cuzdanê xwu ra yew des lîra û yew zî panc lîra vet.

- Mi dir yew lîra asinîn esto, ez bidî to.

- Nê, zehmet meke.

- Çiyêk nêbeno keko, wa yê to wirdî nêbo. Inê pereyê asinînî X-Ray de benê zilim. Merdimî zaf rincan kenê...

- Keyê to awan bo.

- Ê to zî...

- Ti şinê kotî?

- Îzmir. La ti?

- Artvîn.

- Himm, Hopa esta uca de.

- Raşt a, ez şina Hopa.

- Hemşîn zî uca der o?

- Wulay beno ke Hemşîn Rîze de bo. Ez nêzana. Xwura ez Artvînij nîya...

Mi waştbi mesele biyarî ziwanê Hemşînijan ser, dima zî behsê ziwanê ma yê ke roc bi roc vinî beno bikerî, la nêbi.

- He, mi va beno ke ti Artvîn ra bê...

- Nê nê, ez Newşehîr ra ya. Zey "New York" yeno nê, heheh! Ti ça ra yî?

- Semsûr.

- Ez 2005 de şibiya Semsûr. Ez mifetiş a, semedê gureyî ez bol geyrena. Nika zî qey gureyî ez şina. Yew memûrê gumrikî pereyê ke yenê "vinî" keno, ez zî şina ke ê pereyan "bivîna".

- Yanî camêr gumrik ra gumrik gêno...

- Hehee! E wulay... Gumrik de pere bol yeno. Gama ke pere zaf bo zî çiyê winasî benê. Mêrdekî şinê Gurcistan de qumare kay kenê. Gama ke zirar kenê zî zirarê xwu dewlete ra vejenê. La o pere pereyê to yo, yê min o, yê pêro milletê ma yo.

- Raşt a.

- Ti çi kar kenê?

- Dikanê mi esto; ez telefonan, televîzyonan roşena...

- Cînîya mi zî yew kanalê televîzyonî de gurweyena. Meslegê şima zî eynî yo, hehee!

- Hehee!

- Heyat şiyes serrî yo, zaf derg nîyo. Lazim o merdim bihuyo, keyf bikero.

Mi waşt ez vajî merdimê ke derdê ci çin o eşkenê bihuyê la mi nêvat.

- Xwura ti çend sanîyeyan ra reyêk huyenê.

- Hehee! Ma se bikerê bira. Biewnî, ma qisey kerd, ma muhabet kerd, ma huyayî, rayir qedîya... Emir zî winî zey raywanî yo... Haydê bi xatirê to.

Na xebere 1834 rey wanîyaya
No nuşte hema şîrove nêbîyo.