zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
01 Tebaxe 2020 Şeme 14:05

Hesenkeyf

hêlîn

Kalikê mi yew însano şîrinê dinya bi. Tunîkê şelwaranê ey de, zereyê destmale de pişte, çi rey şeker kemî nêbiyêne. Tim û tim vejîyayne geyrayiş û kuçe de, putê ke kaykerdêne, destmala xwu ra sakîn, seki yew xezîna akero, o cis destmala xwu akerdêne û yew şeker dekerdê destê putî. Tim nimajê îneyî ra veciyayiş de miheqeq ameyne keyeyê ma û ma zî bê şeker nêverdayne. Dirûmê yayka mi binêy zeîf bi. Semedê aye ra, a roje sewze, meywe, êdî çi girewt se, nimitkî ronayne pencera înan ver û şiyêne keye. Tabî, yîn zî zanayne kalikê mi o çî ronayo, la her kes nêzanayiş ra ameyne. Sey Xizirî bi. Bêveng, bêdejnayiş û nimite têwgeyrayne.

Ez hewtserre biya ke kalikê mi nêweşîya qanserî ra merd. Semedê dapîra mi û maya mi yew hedîseyo zaf qehirin bi. Semedê ma putan zî yew hedîseyo zaf qehirin bi.

Badê, maya mi yew fotografo siya-sipî yê pîyê xwu gird kerd û çerçewa viraşte, dês wa aliqna. Ewnîyayne fotograf ra, ewnîyayne û bermayne. Yew serê sibayî ma wuriştî û ewnîyayî ke maya mi leçega xwu anta fotografî ser. Nêwaştêne fotografî dês ra biyaro war la deyax zî nêkerdêne ke wina net biaso. Heta ke ma pîl bî, fotograf o cis dêsê ma de aliqnaye mend. Ma kalikê mi tim peyê leçega maya mi ra dî.

Şînê maya mi zaf derg ramit. Qebûlkerdişê şiyayişê tayê çiyan, êdî çinbiyayîşê înan ra bawerkerdiş, zaf zehmet o. Şînê yîn derg rameno, tesîrê înan tay bo zî, nêqediyeno.

Na xebere 1796 rey wanîyaya
No nuşte hema şîrove nêbîyo.