zazaki.net
07 Tebaxe 2020 Îne
Girdîya Karakteran : 12 Punto 14 Punto 16 Punto 18 Punto
11 Adare 2020 Çarşeme 12:10

Gireyo Kor

Evdî Hesqera

-Deza, mi senaryo nûşt la pere çin o ke ez bianca. Him zî çend serrî yo ke senaryo hazir o. Xwura mesrefêko hende bol zî nîyo ha; semedê ekîbê ma yew erebe, semedê fîlmî yew traktor, yew otobuse zî semedê sahneyê raywanîye lazim a. Nika ez dezayê xwu re vaca, fîlm dewe de dest pê keno.

-Aha! Verg yeno!

Nê, heş yeno heş! La çiyêko winî oryantalîst nîyo, realîst o! Laceko des û hewt-heşt serre keye der o, hazirî keno ke şiro bajarêkê dûrî. Inê sehneyî de qiseykerdiş çin o. Keyê ci, keyeyê dewan o. Maya ci ra bellî beno ke kurd ê. Lazim o nat-wet de çend qicî winî zey tutanê dewan estbê.

-Ti do qican se kerê?

-Fonksîyonê înan fîguratîf o. Ti zanê, her keyê ma de davîst kesî nifûs cuyeno. Qandê ci zî keye do qelebalix bo.

-E, qelebalix temam.

-Maya ci heme çiyanê lacekî dekena çenteyêkê kehanî. Fermuarê çenteyî xeripîyaya. A zî derzînî gêna fekê çanteyî derzena. Peynî de zî gire erzena ci. Ez inê sehneyî zaf derg nêkena. Xatirwaştiş maştiş do nêbo dramatîzasyonêko ajîtatîf. Sehneyê bînî de ma vînenê ke lacek û pîyê ci traktorî ser o yê, şinê. Payiz o, wextê qeydê unîversîteyan o.

-Lacek şino unîversîte waneno?

-Çiyêko winasî yo. Fîlmê ma fîlmêko metrajderg nîyo. Ma sehneyê bînî de vînenê ke lacek otobuse der o...

-Verê camî der o, ne?

-E. To senî zana?

-Hela ti dewam bike.

-Ma reyêk-di rey muawînî vînenê. Zafê raywanan kurd ê, la ma ino sehne de zî replîk nêdanê. Fîlm bê qiseykerdiş şino. Tenya vengê dewe, traktor, otobuse filan estê.

-Zey Charlie Chaplin bêveng nîyo yanî?

-Nê deza. Ina bêvengey de bêvengbiyayişê şarê ma esto. Vengê heme çiyan yeno eşnawitiş la vengê miletê ma, ziwanê miletê ma çin o!...

-Polîtîk o yanî?

-Raştîya ma winî ya deza. Derdê ma keweno fîlmê ma... Şewdir lacek yew otogar de otobuse ra yeno war. Destê ci de ewraq-mewraqî estê, edres perseno. Dima şino cayêko zey unîversîte.

-E…

-Verê keyberî de wezîfedarêko zey bekçî esto. Pîzegird û winî antîpatîk. Heme çenteyan kontrol keno, ma fam kenê ke karê ci winî yo. La gama çenteyê lacekê ma gêno, nêşeno akero. Maya ci weş gire dayo piro!

-Êêê?

-Meqes gêno xwu dest û vano "Ino biyo gireyo kor" û dima zî xirt! Gireyê ci birneno! Ma çimanê lacekî vînenê, werdi-werdi bermeno.

-THE END!

-E. To senî texmîn kerd?

-Çiyêko zehmet nîyo texmîn... La ez do se vaca?

-Vac, dezayê mi...

-To vat meselaya şarê ma ya, ne?

-E. Alegorî yo, tede sembolî estê.

-Wa lacek nêbermo.

-Wa bihuyo?

-Ma şarê ma huyeno, xiyar!

-Nê...

-Wa lacek meqes bivîno. Fam bikero mesela senî dewam kena û qebûl nêkero. Wa çenteyê xwu destê ci ra bigêro û şiro, ageyro. Nêbeno?

Na xebere 506 rey wanîyaya
No nuşte hema şîrove nêbîyo.