GELO EŞQ ÇI BÎ?

Eşq… O hîso tewr rind, o hîso bêveng, o hîso bêkes. Gelo sêneyê ma de mendo? Gelo hîna awiranê ma de rêça xo esta? Eşq rîyê camêrdanê ma de, zerrîya cinîyanê ma de, huyayîşê domananê ma de esto?

Wexto ke mi domanîya xo, xo dima peyê beranê mektebê yatilî de verdaybî û ez hêdî-hêdî bîyêne azebe, pîrika mi destê mi pêgirewtêne û mi ra vatêne: “Çi rind az û uzê ma zî mend rîyê na dina ser o. Wexto ke ti bena pîle, ez zaf şa bena. Rinda mi hes bike. Heskerdiş kokê to herre de keno qayîm. Her çî ra zerrî ra hes bike. Sêneyê şarê ma kerrayan ra bîyo pir. Çimanê ma bermayîş, rîyê ma huyayîş kerdo xo vîr ra. Eşqî ma caverdayîme.” Mi bi lex vatêne “Dayê ti çi zana ke eşq çik o.” Aye çimê xo çarnayêne koyan û vatêne “Eşq namê erdê ma yo, eşq vengê awe û vayî yo, eşq sêneyê camêrdî de cayê cinîye, rîyê domanî de welat o. Eşq bêkesîye de kesê ma yo.” Dima destê xo berdêne serê zerrîya xo û dom kerdêne: “Rind ke to nêdî rinda mi, rind ke to nêdî. Rind ke hîris û heşt de to nêdî, wexto ke ma kiştîme senî ma rê tena eşq bermayêne. O wext tena eşq ma rê berma. Tena eşq bî dermanê dirbetanê ma. La ma se kerd, senî kerd eşq kerd xo vîr ra. Nika ma yewbîn ra pers kenîme ‘Gelo eşq çî bî?’”

Mi o wext pîrika xo fehm nêkerdêne. Mi fehm nêkerdêne ke qey yew kokime wina bi dej qalê eşqî kena û seba eşqî sîya dana xo ra. A kila ke awiranê aye de ya kamcîn adirî ra menda, mi qet fehm nêkerdêne. Vatişanê aye tena rîyê mi de yew peşmerîyayîş verdayêne.

Wext vîyard ra û ma zaf çîyan de aver şîme. Ma zaf rayîranê dergan û zehmetinan ra vîyardîme ra. Zaf çî zerrîya ma de merdî, zaf çî zerrîya ma de bî zergûn. Ma pelanê tarîxî ra vejîyayîme û ameyîmê ziwan. Qîrîya ma ya tewr rindeke eşq bî.

Ez çend aşmî yê ke mîyanê şarê ma der a. Û çend aşmî yê ke bi awiranê pîrika xo qayîtê şarê xo kena. Qayîtê cinîyan û camêrdanê xo kena. Qayîtê domananê xo… Vatişê pîrika mi goşanê mi de çerexînê û nika rîyê mi de peşmerîyayîş nêverdanê. Yew tef û duman, yew qîyamet verdanê. Gelo eşq çi bî?