zazaki.net
08 Kanûne 2019 Yewşeme
Girdîya Karakteran : 12 Punto 14 Punto 16 Punto 18 Punto
12 Teşrîne 2019 Sêşeme 10:58

Gayo Asnawber!

Evdî Hesqera

Zey her qicê dewijî mi zî bol gayî dîyê. Xwura dewe de cotêk gayê ma estbî. Cotêk zî yê mêrdeyê ema mi bî. Wexto ke ma keyeyê xwu bar kerd ard qeza, dima zî her serre hewşa ma de tewr tay yew-di mangayî yan golikî estbî. Qandê ci, ez zana ke sloganê ma yo milî “ma bê rêxe nêbenê” yo. Dima, mi dest bi wendiş kerd, ez ameya kewta metropolan. Bajaranê girdan de ca nêbî ma dewarî weye bikerê, ma zî televîzyon akerd, belgefîlman de temaşayê ga û mangayan kerd; mangayê çewlîgî, bîzon û bufaloyê şarî…

Labelê yew cisnê gayan ke mi heta eyro qet nêdîbî zî estê!

Heq selametî bido şima, mi paştîya xwu fitiq kerde. Çend aşmî dejî ez kişta. Ez nêeşkayne payanî ra nimac bikerî, hema vacê, ez kewta destan ver.

Ez şiya nêweşxane: barek fîlm û rontgen û MR û randewu. Asîstanan ra dima doktoran zî va “Asnawe bike. Eke nika ti miqateyê xwu nêbê, ena nêweşî do rew bibo giran, ma do mecbûr bimanin to emelîyat bikin!”

Êyy, ters pîs o. Mecbûr, mi qebûl kerd.

Mi înternet de ewnîyaya, çend otelanê nêzdî de hewzî estbî. Telefon, persayiş, fîyat…

Otelî vayî bî. Vayî bî la halê mi zî hal nêbi. Xwura mi goş nêda xwu, coka ez kewta eno hal!

Vayî-mayî, êdî ez mecbûr menda.

Ez şiya, dima mi hesab kerd: heqê rayî hewt kaxidî. Rocê hewze pancas kaxidî. Seba ke hewza otelî cayê zengînan û lordan û kontan bî, coka personelî mûsaybî bexşîş. Eêê, ma feqîrê tirrekî senî bexşîş nêdin!

Eke şima bipersê, temam, pîyê mi rêncber bi la bapîrê mi axa biyo! Xwura kurdo ke kalikê ci axa nêbo çin o.

Ez ageyrî hesabî ser. Gama ke ez hewze ra vecîyaya, mi ewnîya ke ez ha geste ver mirena. Haydê kurdo, goşt biwere! Hesabê mi bi giran…

Mi ewnîya winî nêbeno, nat û wet mi persa. Embazan va “Şo hewza beledîye. Hem ercen a, hem zî pak a.” Mi zî zey vatişê înan kerd, şimikê miyanengiştî (êy ne mi va ez biya metropolij) û bone (xwura kalikê mi zî axa bi) girewtî, ez şiya.

Heqê hewza beledîye saeta xwu des û panc kaxidî bî. Mi da. Ez şiya odaya bedilnayişê kincan. Zerre bi merdiman pirrî bi. Mi hazirîya xwu kerde, saete bî temam, ez şiya cayê hewze.

Ena hewze hewzanê otelan ra girdêr bî; vîst û panc metreyî derge, vîst metreyî hîra.

Mêrdekan hewze kerdbî kulvar bi kulvar aqitnaybî. Ez kewta kulvarêk û mi senî dest bi asnawe kerd, mi dî kişta bîne ra gayêko asnawber yeno! Ez sond wena, naxira dewa ma de zî gayêko winî çinê bi!

Ga nêbi, tofan bi!

Eke bineyke siya biyêne, nameyê ci do bibiyêne gamêş la sipî bi.

Hahoo, hewze de tsunamî wurişt!

Mi bi zor xwu eşt kenar û xwu muhafeze kerd.

Mi va belkî vaco qisûr ra mewnî, mi ti nêdî. Labelê çiyek nêva, dewam kerd…

Mi asnawe ca verda, mi xwu rê va belkî mi ra vaco ti qey asnawe nêkenê, fam bikero ke ez hêrs biya. La xemê ci nêbi. Gayê mi şi û ame, şi û ame, qet nêvindert.

Mi ewnîya nêbeno, saete do temam bibo, ez winî vinderte ya. Wulay mi va nehlet bo, ez awe ra vecîyaya, şiya kewta kulvarêko bîn. La çimê mi ey ser o bi. Hêrsan ra dej kewtbi pîzeyê mi…

Çend deqayî dima mi dî yew cînî û yew keyneka ke merdim vano keynaya ci ya, ameyî zere. Înan ewnîya ke heme kulvaran de tewr tay di merdimî estê, şî kewtî cayo ke tenya gayê mi tede yo. Labelê ey a deqa de eynî çî ard înan sere zî.

Ez qurbanê cesaretê medenî bî!

Cînîyan kerd qîreqîr, teşqele vejîya.

Heme kesan asnawe ca verda, ewnîya înan ra.

Xelasnayox ame verê hewze. Ê gayê mi ra va “Hewze de ti tenya nîyê, heqê to çin o ke ti winî bikerê!”

Ga hêrs bi, qara, borra, herediya.

Dima zey palewanê sumoyî yê japonan awe ra vejîya, cehnem bi şi.

Na xebere 227 rey wanîyaya
No nuşte hema şîrove nêbîyo.