zazaki.net
19 Adare 2024 Sêşeme
Girdîya Karakteran : 12 Punto 14 Punto 16 Punto 18 Punto
10 Hezîrane 2020 Çarşeme 09:54

Erebeyî...

Evdî Hesqera

Citroen C3... Doblo... Audi A4... Hyundai ix35...

Golf... Qashqai... S320... Siena... L 200...

Mercedes Vaneo! Homa belayê to nêdo, ti şî-şî to dobloya Mercedes girote, dewij! Dewij la dewijo zengîn. Hella hella! Mêrdek hende pere dano, Mercedes gêno la Mercedesa ci zey dobloyan a. Çi heyf!

Palio... Fiat Linea... Land Rover gamê over... Renault B SUV...

BMW... BMW yewa bîne la modelê aye çi yo? Doblo... Transporter...

Yaw ez winî meşîyayiş ra hes kena. Ez cadeyanê girdan de şina û yena, cînîyanê zerdan, keynan, siyayanê Afrîqayijan, telebeyan, ballîcîyan, parsekan, zengînan, çopçîyan, qican, extîyaran, maxazayan, dikanan, donercîyan, berberan, telefonrotoxan, pastexaneyan, nêweşxaneyan, dermanxaneyan, qirtasîyeyan vînena keyfê mi yeno. Tewr zêde zî erebeyan... Erebeyanê neweyan, luksan, yê normalan, sûran, sipîyan, lacîwerdan... Inê winî şinê yenê keyfê mi beno weş...

Volvo... Honda... Doblo... Corolla... Megane...

Broadway... Nissan Micrayeko zey kesayan... Doblo... Siena... Porsche...

Her ke ez kar ra vecîyena winî nîm saetêk cadeyan de geyrena, ez rehet bena. Xwura ma des saetî binê hardî de gurweyenê, ma çiyêk nêvînenê. Zafaneyê atolyeyê karê tekstîlî binê hardî der ê, raqim: -2, -5 yanî. Vengê makîneyan, qîrayişê westayan... Boya merdimî bena tenge. Teber de ez dinya vînena, ez dûrî ra çilayanê bînayanê berzan ê semtanê zengînan vînena... Eynî zey fîlman ê, merdim vano ino bajar eynî Amerîka yo...

Mercedes C180... Laguna... Mondeo... X5...

Passat... Doblo... Auris... Mazda... Şahin... Şahin!

Ehmedê ma, dezayê min o tewr gird par Şahînêk girotbî. Mi va "Şima şeş tenî gurweyenê, ti nêeşkayî erebeyêka weşêr bigîrê! Şar, eke keyeyêk de şeş tenî bigurîyê, di serran de daîre û tewr tay doblo-moblo gênê. Yê to, di lacê to garsontî kenê, Hesîbe û Nesîbe yenê atolyeya tekstîlî de gurweyenê. Cînîya to nêrdîwenanê apartmanan şuwena. Ti bi xwu înşeat de bekçî yê. Mesrefê şima çin o, qey ti erebeyêka weşêr nêgênê?" Vat "Şar nêweno nêşimeno pere dano arê. Ma winî nêkenê, qicî gune yê, şinê gurweyenê wa xerc zî bikerê. Şar tenya nan weno ban gêno, ma vanê wa sifre de goşt estbo, hingimîn estbo; wa fina ban kirê bo. Qicê werdî zî ez tew nêvana..." E, dezayê mi raşt vano. Xwura lacê axayan o, normal o ke sifreyê ci de her wext goşt hazir bo. Dewe de winî bî, qewurmeyê ey heme wext estbi. Se tenî pesê ci estbî. Goştê varekan, qazan bol bî. Camêrdî dewe de bê goşt şamî nêwerdênê.

SSANGYONG... Kia Sorento... Chevrolet... Doblo...

Ducato... Skoda... Seat Cordoba... Clio... Navara... Elantra...

Pîrika mi vatêne, vatêne gama ke Ehmed bî, ma vat torno verîn o, wa pes û dewarî ra hes bikero. Hes bikero ke pes dewar bikero weye... Ma nake birna, axur de wedarte. Ma va gama ke bî gird, wa bizê ma, mêşnê ma, mangayê ma kêmî nêbê.

Peugeot 407... Jetta... Doblo... Fluence... Mercedes A180...

Megane... Isuzu D-Max... Skoda... Doblo... Clio...

Eynî bi winî. Heywanan ra zaf hes keno. Dewe de keyf keyfê ci bi. La cînîya ci ewnîya cînîyanê fîlman ra, ewnîya reklaman ra; vat îlla ma do keyê xwu biberin Îstanbul. Ehmedî se kerd nêkerd cîneke razî nêbî, hizûrê înan nêmend. Ehmedê dezayî vat yan ez do cînî verada, yan dewa xwu... Êy cîneke zî keynaya xalê ci ya. Peynî di dewe verada ame Îstanbul. Ey ra dima zî yew bi yew ma biyî macir, wa ganê artîstanê televîzyonan weş bo! Cînîyanê ma vatêne ke ma do şirê Îstanbul, zey înan bibê xatûn. Cuya Îstanbulî zey texmînê înan nêbî la fina zî qebûl nêkenê ma ageyrin...

Tata... Mondeo... Doblo... Opel Insigna... Laguna...

Mini Cooper... Seat... BMW... Doblo... Doblo...

Ma pes û dewarê xwu rot, ameyî kewtî inê qulikan. Helbet merdim dima do bimûsayêne bodruman zî, Homa kumandaya televîzyonî cînîyanê ma dest ra nêgêro, bes o. La Ehmed zey ma nîyo, nêmûseno, nêşeno bimûso Îstanbul. Zaf bêrîya dewe, pes û dewarî keno. Bêrîkerdiş çi yo; hesreta înan ver mireno! Ez bawer kena her roce des rey, vîst rey dewe kewena vîrê ci. Her ke ez şina keyeyê ey ez vînena yan Yaban Tv, yan Citêr Tv akerde yo, ewnîyeno heywanan ra... Xwura tenya o kumanda nêdano cînîya xwu dest. Vano "Mi kumandaya heyatê xwu daya to dest, wa kumandaya televîzyonî zî mi dir bo."

Porsche, Dacia,  Doblo, Subaro, Alfa Romeo...

JEEP, Chery, Honda Jazz... Daihatsu...

A nika qelebalixê trafîkî dest pê kerd, heme erebeyî do vinderê. Gama ke zaf bi lez şinê yenê keyfê ewnîyayişî zî nêmaneno. Inê ra tepîya ez do rehet temaşe bikerî.

Mi vizêr dihîrê de Qedrîyê dewijê ma rê vat ez her şan şina winî geyrana. Ey vat, lacê ema mi cadeyanê girdan de awe roşeno. Gama ke milet trafîk de teyşan beno hema awe gêno. Ti zî çiyêko winî bike, him biewnî erebeyan ra him zî awe biroşe. Xwura gama ke erebeyê luksî awe gênê panc lîrayî, des lîrayî, vîst lîrayî danê, vanê “Temam” û pereyê serî nêgênê.

Çiyêko raşt o, mi awrotiş verê nikayî zî eşnawitbi. Beno ke ez zî awe biroşa...

Mi heta nika çend rey Chrysler dî, belkî ez wextê rotişê awe de lîmuzîn zî bivîna. Belkî wayirê ci vaco "A to rê se milyon, di sey milyon, pereyê serî lazim nîyo" zî, merdim nêzano.

Mercedes... Hyundai... Golf... Dacia... Focus...

Chevrolet... Jetta... Audi A6... Range Rover...

Na xebere 1558 rey wanîyaya
No nuşte hema şîrove nêbîyo.