zazaki.net
19 Oktobre 2017 Panşeme
Girdîya Karakteran : 12 Punto 14 Punto 16 Punto 18 Punto
17 Çele 2015 Şeme 17:40

Cinê Ap Husî

Roşan Lezgîn

Dewa Ap Husê Keyê Hesan dewêka awî ya, heme bax û baxçe ya.

Rojêk Ap Hus mîyanê baxçeyê xo de xebitêno, baxçe awe dano. Eke karê xo qedêna, germê mîyanrojî de versîya valêre de, mîyanê vaşî de xo rê kîşta kuweno, îstîrehet keno. Valêre zî hende weş gilî dayê, pel akerdo, merdim hetanî nêşo ver, xususî bala xo nêdo, kes nêaseno.

Tam wextê încasan o, daran ra dersayê, bux girewto. Încasî hende dersayê ke êdî şeqayê, gîtreyê şîrinîye şeqan ra dayo teber.

Çend xortê dewe şinê dekewenê gola çemî ke binê baxçeyê Ap Husî de ya. Dima, şinê kuwenê baxçe, încasan wenê.

Xebera xortan Ap Husî ra çin a. La Ap Hus înan weş vîneno. Vînayîşî vîneno labelê vengê xo nêkeno, vano, wa xo rê încasan biwerê.

Xortî mirdîya xo încasan wenê la ver de nêvindenê. Ap Hus ewnîyeno ke xortî ha încasan verdanê yewbînan, êdî pê kelebut kenê, deyax nêkeno, vano:

- De bes, de bes!

Xortî eşnawenê ke vengê Ap Husî ame la nêzanê kamca ra ame. Nat ewnênê wet ewnênê, kesî nêvînenê. Vanê qey xeyal o, ancî însacan vir kenê, erzenê yewbînan. Ap Hus bê ke wurzo xo ser, wina kiştakewte cayê xo ra ancî vano:

- Lalawo de bes, de bes!

Na rey veng tam şino xortan, ewnênê derûdorê xo ra la ancî tu kesî nêvînenê.

Tabî xortî bawer nêkenê ke na saete de Ap Hus mîyanê baxçeyî de yo. Xo rê vanê, de Ap Husî baxçeyê xo awe daya şîyo keye. Heto bîn ra, anê vîrê xo, eke nêzdîyê nîm saete yo ha mîyanê baxçeyî de qalûqir kenê, încasan wenê. Eke Ap Hus ê doran bîyêne, hetanî nika muheqeq vengê xo vetêne.

Xortî yewbînan ra vanê, wilay cinê Ap Husî ha mîyanê baxçeyî de, ma zaf bêhurmetî kerde, coka cinî vengê xo kerdo sey vengê Ap Husî û ha vano “De bes, de bes!”

Xortî tersenê, saw înan gêno. Vanê xirp û remenê. Êdî tersan ra reyna nizdîyê baxçeyê Ap Husî ra zî nêvîyarenê.

Na xebere 5231 rey wanîyaya
ŞÎROVEYÎ
...
Cuo
Cumle şıma "Devrik" cümleyi ca ca sanki çend kelime zi zazaki niyi sanki. Ama reyne zi zazaki ser xebata muhim ey şıma ya.
13 Sibate 2015 Îne 23:19