zazaki.net
24 Tebaxe 2017 Panşeme

Bedrîye Topaç / Nuştox

Wele

03 Çele 2012 Sêşeme 20:11

Ez yew ziwano dirbetin de bermena. Eke no ziwan bihuyo gelo şima se kenê?

Wexto ke homayan vengê xo to ra peyser girewt û vengê to kî xerîb û bêwayîr mend. Heskerdişî ke şilî kerde zereyê to, kuçanê to ra bêveng xiz bî şî. Tu kesî ti fehm nêkerdî. Asmênê keweyî ke verê hewranê sîyayan de vileyê xo kerd çewt, rîyê xo ke to nêmisna, ti meterse û çimanê xo de mergî meke meyman. Rîyê xo biçarne sixletîya teynayîya mi. Ez sey yew maye virar fînena dejanê to ra. Ez to rê bena yew lîhef û dirbetanê to sey dirbetanê xo pêşena.

Ez wel a. Ez wela to ya.

Wexto ke şewe bîye di leteyî û dormê to de kî xirabîye pirenê rindîye girewt pa, yew koyo berz bê xezalan ame û sêneyê to de ca girewt, domanîya to ke dûran de berma, ti meterse. Tarî de embazîyê meke. Rîyê xo biçarne roştîya mi. Ez hende huyayîşê to, to ra nêzdî ya. Destanê xo derg bike û destanê mi pê bije.

Ez wel a. Ez wela to ya.

Wexto ke çimanê to de awa soline qedîye û goşê to seba vengê daristanî bermayî, mîlçikan ke rîyê to ca verda, cuye ke to ra xatir waşt û ti bêsitar mendî, sey pars kerdene to ziwanê xo arê kerd, ti meterse. Destê hêvîye rameverde. Çimanê xo biçarne çimanê mi. Ez piştîya xo de seba to tîje ramena. Yew têla porê mi to rê bena yew daristano gird.

Ez wel a. Ez wela to ya.

Ey bargiranê dewranî! Barê to giran o, ez zanen…

Ez senî to ra hes kena, to dî? Demo ke wext şikîya, mi ti ardîbî rîyê dinya. Cayê xizanîye sêneyê mi de çin o. Gelo ti zana, mi seba to peyê xo de çend çiman de hesirî ziwa kerdî? Gelo çimanê mi de çend hesirî mendî?(*)

_____________

(*) No nuşte “Newepel, Rojnameyo kulturî yo 15 roje, hûmare 16, Dîyarbekir, 01-15 teşrîne 2011, r. 6” de weşanîyayo.

No nuşte 873 rey wanîyayo
No nuşte hema şîrove nêbîyo.