zazaki.net
21 Tebaxe 2017 Dişeme

Bedrîye Topaç / Nuştox

Meraq

28 Tebaxe 2011 Yewşeme 20:54

Mi Homayan ra nimite çekuyê xo arê kerdî, serê pelê huşkî de nuştî, to rê hewrî reyra ruşnay. Mi huyayîşê xo yo nêmezet mîyanê hezar çekuyan de to rê dîyarî kerd. To mîyanê hende çekuyan de ez dîya? Ez ziwane xo de bîya yew çeku û waştîya to ya verenê arde bi vîre to? Ez sey adirî ginaya çengê zerrîya to ro? Mi hewnê to kerdî leteyî?

To mîyanê hende çekuyan de bêvengîya mi dîye? Bêvengîya mi bêvengîya kutika kuçan a. Ez dekewta mîyanê mezgê to û mi to rê cuye kerd tenge? To bêhêvî xo eşt kuçe? Ez bîya yew dilopêka awa Munzurî ra vişîyaya û dekewta mîyanê hesîrê çimanê to? To hendayê qîyametî hesrî ra Homayan rê didanî qireçnay?

Ti mi meraq kenî? Ti meraq kenî ke bedenê mi senîn o? Bedenê mi çin o. Mi kerranê bedenê xo ra seba zerrîya xo zindanî viraştî. No semed ra duştê na cuye de teyna di destê mi mendî. Nê destî çekuyan ra awe gênê û vileyê xo kenê berz. Nê destî hêdî-hêdî benê hewzî.

Ti mi meraq kenî? Ti meraq kenî ke vengê mi kotî ra yeno? Ez zaf dûrî de nîya. Cayo ke merdimî seba qîsaweta wisarî mîyanê kitaban de vile kenê huşke, ez uca der a. Cayo ke merdimî seba merdene ra remayîşî sewdaya xo roşenê, ez uca der a. Cayo ke her şewe cuye kincanê xo vezena û merdene dana xo ra, ez uca der a.

Ti mi meraq kenî? Ti meraq kenî ke huyayîşê min o nêmezet kotî ra yeno? Ez zaf dûrî de nîya. Cayo ke her şewdir tîje bidejî porê xo yo rindek û sûrela ruçkinena, ez uca der a. Cayo ke koyî seba yew kemere bermenê, ez uca der a. Şaristano ke behrî xo vîr ra kerdê, ez uca der a.

Ti zana? Wexto ke merdena teyran ame, yenê nê şaristanî de vindenê. Ez kî sey înan ameya nê şaristanî de roja merdena xo pawena.

Ti hîna mi meraq kenî? Ti meraq kenî ke çimê mi kotî yê? Urze û qayîtê asmênî bike. Çimê mi asmên der ê. Çimê mi zereyê çimanê to der ê.

Ez tîya ya...

No nuşte 1161 rey wanîyayo
No nuşte hema şîrove nêbîyo.