zazaki.net
23 Teşrîne 2017 Panşeme

Bedrîye Topaç / Nuştox

Ez û Ti

20 Çele 2012 Îne 11:19

Dîcle! Teyşanîya zerrîya mi, hesreta omrê mi…

Şewî ke bê şodiran mendî, mi estareyî day to. La to sêneyê xo ra zerrîya xo vete û da mi.

Çi weş! To zerrîya xo da mi.

Nika sêneyê mi de zerrîya to erzena. Ez endî roştîya zerrîya to de rayîra xo vînena. Nêzan çayê, zerrîya min a newîye ra vengê deyîran beno berz.

 Û rîyê mi de huyayîş bê ca maneno!...

Asmên ra ke qersûnî sey vewre varay, mi gulî day to. La to bedenê xo da mi. Ez endî bedenê to de fetilîna. Ez endî bedenê to de ruhê xo kena mird. Nêzan çayê, no bedenê min o newe de ez çin a.

 Û no bedeno bêwayîr yew çî paweno!...

 Ziwanê şarî ke mîyanê lewanê mi ra ziwanê mi girewt, mi bêvengîye da to. La to vengê awa Dîcle da mi. Endî Dîcle de çekuyê mi herekînê. Endî ziwanê mi awe de beno zergun. Nêzan çayê, no ziwanê min o newe de xemgînîye esta.

 Û vengê bermeyê domanan yeno!…

Ey Dîcle! Gelo rojê hewno weş ma rê beno dîyarî û porê to sêneyê mi de axme beno?

 

Muzir! Heskerdoxê çimanê mi, vengê zerrîya mi.

Rindekîye ke çimanê merdimîye ra şîye, mi asmêno kewe da to. La to her di çimê xo vetî û day mi.

Çi weş! To di çimê xo day mi…

Ez endî çimanê to ra qayîtê rîyê hardî kena. Ez endî çimanê to ra renganê merdimîye vînena. Nêzan çayê, çimanê min ê neweyan de cayê hesiran ra endî laser şino.

 Û heskerdiş gêj o!...

Înan ke şaristanê dormeyê ma veyşnay, mi yew wareyo newe da to. La to Dêrsimê zerrîya xo mi rê kerd ra. Ez endî pay nana wela to ro.  Ez endî bêters dewe bi dewe fetilîna. Nêzan çayê, na wela xo ya newîye de ez tik û tenya ya.

 Û qederê mi sey wele sîya yo!...

Bendan ke dormeyê ma girewt, mi yew qisawete da to. La to çewres çimeyanê xo ra ciwiyayîş da mi. Ez çimanê to ra hêdî-hêdî cuye şimena. Ez endî cuye nameyê to ra nas kena. Nêzan çayê, na cuya newîye de vengê yew şarê esmerî goşanê mi de zêdîno.

Û sey heskerdîşe to qedîyayîş nêzano!...

Ey Muzir! Gelo rojê no vayê sirgunî ma ra dûrî şono û lewê mi lewanê to ser o azney kenê?*

______________

* No nuşte Newepel, Rojnameyo kulturî yo 15 roje, Hûmare 17, Dîyarbekir 16-30 teşrîne 2011, r. 6 de weşanîyayo.

No nuşte 751 rey wanîyayo
No nuşte hema şîrove nêbîyo.