zazaki.net
23 Teşrîne 2017 Panşeme

Bedrîye Topaç / Nuştox

Desteştiş

17 Temmuze 2011 Yewşeme 16:58

Yew desto xirab dergê leşa kêynekê bî.

Zerrîya aye rut û rupal mende. Çimanê aye ra gonî ameye. Kêyneke bêveng berma, kes bi vengê aye nêhesya. Şima zî nêhesyayî. Tena aşme bi vengê aye hesya û asmên caverda, seba aye ameye rîye hardî. Aşme kêyneke girewte zereyê xo, dirbetê aye nimitî.

Wext vindert. Wext bêveng vindert. Ez şona…

Serran ra tepîya, duştê mi de peyê berê asinênî de vinetî ya. Porê xo yo kilmek û sîya, leşa xo ya zare û çimê xo yê sey şewe qet nêvurîyayê. Tena mîyane birûyanê aye de xetêka xorîne virazîyaya. Çimê aye sey mergî serdin ê. Çimanê aye de ez xo vînena, ez şima vînena. Ez vînena ke kamî destê xirabîye nayo leşa aye ra. Leşa mi lerza. Kamî ke huyayîşê aye rîyê aye ra tirawito, fekê mi ra vengê mi şîyo. Ez hîna sey aye zerrîya xo de sanikan kena weye, ez hîna sey aye dormeyê xo de dêsan virazena.

Wext vindert. Wext bêveng vinet. Ez şona…

Mi destê xo kerd derg ke a bêro zerrîya mi, ez aye rê bibî sitare. A destan ra tersena. Ez nîyadana, çimanê aye de adir vêşeno. La a merdî ya. Rîyê xo açarnena û hêdî-hêdî şona binê hardî. Domanîya mi şona û destê mi ra qet çîyê nîno. Qîyametê mi werzeno. Asmênê mi û hardê mi ca vurnenê ra. Estareyê mi deverdîyenê. Ruhê mi beno vîndî.

Wext vindert. Wext bêveng vindert. Ez şona…

Veng bide mi, veng bide domanîya mi. Herre ma rê bermena, hewrî ma rê bermenê, behr ma rê bermeno. Şima zî bibermenê, şima zî sîya girê bidêne. Domanîya mi ra, mi rê û şima rê tena mîyane birûyanê mi de xetêka xorîne manda.

Wext bêveng şono. Ez vineta. Çimê mi qayîte şima kenê…

No nuşte 614 rey wanîyayo
No nuşte hema şîrove nêbîyo.