zazaki.net
20 Temmuze 2018 Îne
Girdîya Karakteran : 12 Punto 14 Punto 16 Punto 18 Punto
22 Hezîrane 2018 Îne 12:44

TIRKÎYA DAT HECÎ MEHMED ELÎ

Nûrî Keleş

Şantîyeyê MTA (Maden Tetkik Arama) mezraya dewa ma Dereyê Kaşkûn de ronaybî. Muhendisê tirkan ameybî, geyrayên ke koyanê ma de kanê madenî tesbît bikerê. Rakewtiş û werdişê muhendisan şantîye de bi.

Taştereyêk ma gedeyî dewe ra şîyên verê şantîye de xwu nayên zuev (pawitişê çîyêk). Rojêk ma çend gedeyî şî verê şantîye de xwu na zuev ke yew piranê nanê firine bidê ma. Werdpewjê şantîye Mehmûdan ra Ehmedê ema Eyşe bi. Ehmedê ema Eyşe nanê firine û tirşê kartolan da ma. Dima muhendîsî ameyî, nanê xwu werd.

O mîyan de dat hecî Mehmûd zî ame verê şantîye, muhendîsan dat hecî û ma rê çay îkram kerde.

Dat hecî Mehmûd êdî extîyar bi, wexto ke eskerî kerdbî çend qalî tirkî musabi la dima kerdbî xwu vîr ra, yanî tirkî nêzanayên. Dat hecî yew çay şimite, şûşeyê xwu derg kerd, yew muhendisî ra bi îşaretê destan da zanayiş ke ci rê yewna çay dekerê. Tey zî vatên “İçmiyor, içmiyor!” Labelê dat hecî manaya ez yewna çay şimena de vatêne “içmiyor”.

Axir înan şûşeyê ci dekerd, şûşeyo diyin zî şimit. Ancî şûşeyê xwu dergê muhendisî kerd, ina rey bi destê xwu manaya “hîn bes, ez nêşimena” de têşana û bi tirkî va “İçiyor, içiyor!”

Welhasil dat hecî di qalî tirkî zanayên la ê zî xelet  û verbapey bî. Homa rehma xwu pê bikero, cayê ci cenet bo.

Werreyê mi bi ê rojan ke kesî tirkî nêzanayên. Wa ziwanê ma tim qalî bibîyên, winî xelet zanayişê tirkî ma rê qet mesele nêbi!...

Na xebere 759 rey wanîyaya
No nuşte hema şîrove nêbîyo.