zazaki.net
28 Adare 2017 Sêşeme
Girdîya Karakteran : 12 Punto 14 Punto 16 Punto 18 Punto
27 Oktobre 2016 Panşeme 19:55

Randewû

Necîbe Kirmizgul

Mabên ra epey wext ravêrd. Ewro reyna ez ameya to het. Bi raştî ez tim to het der a. Hema ewro hîna rojêna taybet a. Coy ra mi xo zaf weş hazir kerd. Ez lîlikî ver o vinderda, winîyaya xo ra. Mi lîlik de ti dî. Ti zaf rindek asayî. Mi şewqê to xo de dî. Ti mi de beriqîyayêne. To vatê qey ez bîya ti. Ma yewbînan de vindî bibî. Mi saetan a temaşeyê to kerd.

Mi xo xemilna, mi ti zî xemilnayî. Ma êdî hazir bî. Ez şew ra, şefaq ra rew kewta rayîran ser. No qor ez hîna bihêvî ya! Mi ray ra goştarîya deyîran kerd. Çi tesaduf, heme deyîran qalê to kerdêne. Ez ranêkewta, na raya pîroze de rakewtiş nêbîyê. Her deqa, her sanîye gerek ti hêşê mi, qelbê mi, rihê mi de bîyayê.

No qor ez bi dîqat ewnîyaya rayan ra. Mi qet gamên ser de nêeşte. Ez her game cuyaya. Mi xeyalî pa nayî. Ez hewran ser ra perraya. Ez şîya û şîya…

La peynîya raywanîya mina ewroyî sey na şîîra Özdemir Asafî qedîyaye!

Mi yewî ra hes nêkerdêne

Ey zî mi ra hes nêkerdêne

Rojêk ma yew ca de randewû da yewbînan

Ez nêşîya

O zî nêame*

_______________________________________

*No nuşte “Newepel, Rojnameyê kulturî, Hûmare 89, Dîyarbekir, Temmuze 2016, r. 6” de weşanîyayo.

Na xebere 1473 rey wanîyaya
No nuşte hema şîrove nêbîyo.